ކޯރުން ދައުރުވާ ފެން ހިފެހެއްޓުމަށް ހަދާފައިވާ ޑޭމެއް ވެއްޓުމުގެ ސަބަބުން ނައިޖީރިއާގެ އިރުއުތުރުގެ ހިސާބެއްކަމުގައިވާ، ބޯނޯގައި ފެންބޮޑުވެ އެ ހިސާބު އެއްކޮށް ފެނު އަޑިއަށް ގޮސްފިއެވެ. މި ހާދިސާގެ ސަބަބުން އެ ހިސާބުގެ އެތައް މިލިއަން މީހަކަށް ގެއްލުންވުމުގެ އިތުރުން، އެ ހިސާބުގެ އަވަށެއް ކަމުގައިވާ މައިޑުގުރީގައި ހުރި ޒޫއަކަށް ގެއްލުންވެ، އެތާންގައި ތިބި ކިނބޫތަކާއި ހަރުފަތަށް ވެސް ވަނީ އާންމުން ދިރިއުޅޭ ހިސާބުތަކަށް ގޮސްފައެވެ.

ގާތްގަނޑަކަށް ދެ މިލިއަނެއްހާ މީހުން ދިރިއުޅޭ މި ސަރަހައްދުގައި މި ހާދިސާގެ ސަބަބުން ގެއްލުން ލިބިފައިވާ މީހުންގެ އަދަދު މިލިއަނަކަށް ވުރެން ގިނައެވެ. އަދި ފެން ބޮޑުވެފައިވާ ހިސާބުތަކުގައި ގިނަ ބަޔަކު ތާށިވެ، އެ ސަރަހައްދުތަކުން ނުކުމެވޭ ގޮތް ނުވެފައި ތިބިކަމަށް، އަލްޖަޒީރާގެ ނޫސްވެރިއަކު ވަނީ ރިޕޯޓުކޮށްފައެވެ.

މި ހާދިސާގެ ސަބަބުން ގެއްލުން ލިބިފައިވާ މީހުންގެ އަދަދު އަދި އިތުރުވާނެކަމަށް ބެލެވިފައިވާއިރު، އެ ހިސާބުގެ ގިނަ ގެތަކެއް ވަނީ ފެނު އަޑިއަށް ގޮސް، މަގުތައް ވަނީ ފެންއާރުތަކަކަށް ބަދަލުވެފައެވެ.

މި ހާދިސާގެ ސަބަބުން ހާލުގައިޖެހިވާ މީހަކު ހާމަކޮށްފައިވާ ގޮތުގައި، ފެންބޮޑުވެފައިވާލެއް އަވަސްކަމުން، އެކަން އެނގުނު އިރު މުޅި ގޭތެރެ އޮތީ ގާތްގަނޑަކަށް އަޑިއަށް ގޮސްފައެވެ. އަދި އެ ވަގުތު ލައިގެން ހުރި ހެދުން ނޫނީ، އެމީހުންގެ ދިރިއުޅުމުން ސަލާމަތް ކުރެވުނު އެއްޗެއް ނެތްކަމަށްވެސް އޭނާ ހާމަކޮށްފައި ވެއެވެ.

ނައިޖީރިއާގެ ކަމާގުޅުންހުރި އިދާރާތަކުން މިހާރު އަންނަނީ ހާލުގައި ޖެހިފައިވާ މީހުންނަށް ވަގުތީ ހިޔަލެއް ހޯދައިދިނުމަށް ހޭބޯނާރައި މަސައްކަތް ކުރަމުންނެވެ. އ.ދ. އިން ހާމަކޮށްފައިވާ ގޮތުގައި، މިއީ ފާއިތުވި 30 އަހަރުގެ ތެރޭގައި ނައިޖީރިއާގެ އިރުއުތުރުގައި ފެން ބޮޑުވުމުގެ ސަބަބުން އެންމެ ބޮޑަށް ގެއްލުން ލިބޭނެ ފަހަރެވެ.

ނައިޖީރިއާގެ މި ސަރަހައްދަކީ ޓެރަރިސްޓް ޖަމާއަތެއްކަމަށް ކަނޑައަޅާފައިވާ ބޮކޯ ހަރަމް އުފަންވެފައިވާ ސަރަހައްދެވެ. މި ޖަމާއަތުން ވަނީ ފާއިތުވި ފަނަރަ އަހަރުގެ ތެރޭގައި އެތައް ބަޔަކަށް ނުތަނަވަސްކަން ގެނަސް، ގިނަ ބަޔަކު މަރާލާފައެވެ.