ރާއްޖޭގައި ކުރިޔަށްދިޔަ ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ) ވިމަންސް ވޮލީބޯލް ޗެލެންޖް ކަޕްގެ ފައިނަލުގައި ދިވެހިރާއްޖެ 3-2 ސެޓުން ބަލިކުރުމަށްފަހު ކިރްގިސްތާނުން މުބާރާތުގެ ޗެމްޕިއަންކަން ހޯދައިފިއެވެ.

ލީގު ފޭސްގައި ކިރްގިސްތާނާ ދެކޮޅަށް ކުޅުނު މެޗުގައި ސީދާ 3 ސެޓުން ރާއްޖެއަށް މެޗު ގެއްލުނު ނަމަވެސް، ފައިނަލުގައި ދިވެހި ކުޅުންތެރިން ވަނީ މޮޅު ކުޅުމެއް ދައްކާ، އެ ނަތީޖާ ބަދަލު ކުރުމަށް ބުރަ މަސައްކަތްތަކެއް ކޮށްފައެވެ. ނަމަވެސް، އިސްކޮޅުން ދިގު ކުޅުންތެރިން ހިމެނޭ ކިރްގިސްތާނު ޓީމާ ދެކޮޅަށް ދެވަނަ ފަހަރަށް މި މުބާރާތުގައި ދިވެހި ޓީމަށް ނާކާމިޔާބީއާ ކުރިމަތިލާން ޖެހުނީ، ހެދުނު ކުދި ކުދި ގޯސްތަކުންނެވެ. އަދި ކިރްގިސްތާނާ ދެކޮޅަށް ރާއްޖެއިން ހޯދި ދެ ސެޓަކީ އެކަން އަވަސް މުސްތަގްބަލެއްގައި ބަދަލުވެދާނެ ކަމުގެ އަލިގަދަ ހެއްކެކެވެ.

ފައިނަލު މެޗުގައި ފުރަތަމަ ސެޓު ކާމިޔާބުކުރީ ކިރްގިސްތާނެވެ. އެ ސެޓު 25-17 އިން އެ ޓީމު ކާމިޔާބުކުރި އިރު، ދިވެހިރާއްޖެއިން ވަނީ ދެވަނަ ސެޓު 24-26 އިން ކާމިޔާބުކޮށްފައެވެ. ދެން އަނެއްކާ ތިން ވަނަ ސެޓު ކިރްގިސްތާނުން 18-25 އިން ކާމިޔާބުކޮށްފައި ވަނިކޮށް، ދިވެހިރާއްޖެ އިން ހަތަރު ވަނަ ސެޓު ގެންދިޔައީ 12-25 އިންނެވެ. ފަހު ސެޓުގައި ކިރްގިސްތާނުން ނެގި ބޮޑު ލީޑަކާއެކު، އެ ޓީމުން އެ ސެޓު ކާމިޔާބުކުރި 15-09 އިންނެވެ.

ފައިނަލް މެޗުގައި ދިވެހި ޓީމުގެ  އައިޝަތު މާޖިދާ (މާޖީ) އާއި ޝަހާ ޝާމިން އަދި ޖޫޒާން ޒަރީރު ވަނީ ފާހަގަކޮށްލެވޭ މޮޅު ކުޅުމެއްދައްކާފައެވެ.

މި މުބާރާތުގައި ރާއްޖެއިން މި ހާސިލްކުރި ރިހި މެޑަލްއަކީ، ބައިނަލްއަގްވާމީ ލެވެލްގައި ރާއްޖޭގެ އަންހެން ވޮލީ ޓީމުން ހާސިލްކުރި ތިންވަނަ ރިހި މެޑަލްއެވެ. އެންމެ ފުރަތަމަ 2019 ވަނަ އަހަރު ނޭޕާލްގައި ބޭއްވި ސެންޓްރަލް ޒޯން މުބާރާތުންނެވެ. އޭގެ ފަހުން، މިދިޔަ އަހަރު މާލޭގައި ބޭއްވި ފޯ ނޭޝަންސް ކަޕުންނެވެ. އަދި މި ފަހަރު، ކާވާ ޗެލެންޖް ކަޕްގައެވެ.