ނ. ހޮޅުދޫގައި މަރުވެފައި އޮއްވައި އިއްޔެ ފެނުނު އަންހެންމީހާގެ ހަށިގަނޑު މާލެ ގެނެސްފިއެވެ.

ފުލުހުންގެ އިދާރާއިން ވިދާޅުވީ، އެމީހާގެ ހަށިގަނޑު މާލެ ގެނެސްފައިވަނީ ރޭގެ ދަންވަރުގެ ވަގުތެއްގައެވެ. އަދި އޭނާގެ ހަށިގަނޑު މާލެ ގެނައީ މަރުގެ ސަބަބު ދެނެގަތުމަށް ޕޯސްޓް މޯޓަމް ހެދުމަށް ރާއްޖެއިން ބޭރަށް ފޮނުވުމަށެވެ.

ފުލުހުންގެ އިދާރާއިން ވިދާޅުވީ މަރުގެ އެމައްސަލަ އާއި ގުޅިގެން މިހާތަނަށް މީހަކު ހައްޔަރުކޮށްފައި ނުވާ ކަމަށާއި، އެމައްސަލަ ބަލަމުންދާ ކަމަށެވެ.

މަރުވެފައި އޮއްވައި ފެނުނު މީހަކީ، ނ. ހޮޅުދޫ، މާރަނގަ، ޒަކިއްޔާ މޫސާ މަނިކެވެ. އޭނާގެ މަރުވެފައި އޮތް އިރު އޭނާގެ ކަރަށް ތޫނުއެއްޗަކުން ޒަޚަމްތަކެއް ލިބިފައިވެއެވެ. އޭނާ މަރުވީ އަމިއްލައަށްތޯ، ނުވަތަ މީހަކު އޭނާ މަރާލީތޯ ވަނީ ސުވާލު އުފެދިފައެވެ.

އެރަށުން މައުލޫމާތު ދިން ގޮތުގައި ޒަކިއްޔާގެ ނަފްސާނީބަލީގެ ހާލަތު މިފަހަކުން ގޯސްވެފައި ވެއެވެ.