ޒަމާނީ ފެނަވަރަށް އަމީނީ މަގު ތަރައްޤީކުރުމަށް ކުރަމުންދާ މަސައްކަތުގެ ދަށުން އިތުރު ދެ ސެގްމެންޓުގައި ތާރު އެޅުމުގެ މަސައްކަތް ފަށައިފި އެވެ. ރޯޑް ޑިވެލޮޕްމަންޓް ކޯޕަރޭޝަން، އާރުޑީސީން ބުނީ މި 2 ސެގްމަންޓްގައި ތާރު އެޅުމުގެ މަސައްކަތް ފަށާފައިވަނީ ރޭގައިކަމަށެވެ.

އެ މަސައްކަތް ކުރާ ރޯޑް ޑިވެލޮޕްމެންޓް ކޯޕަރޭޝަން (އާރުޑީސީ)ން ބުނީ، އަމީނީ މަގުގެ ސެގްމެންޓު އަށެއް އަދި ނުވައެއްގައި ތާރު އަޅަން މިހާރު ފަށާފައިވާ ކަމަށެވެ. 

މި ދެ ސެގްމެންޓުގެ މަސައްކަތުގެ ދަށުން ތާރު އަޅަނީ ރަށްދެބައި ހިނގުމާ ހިސާބުން ފެށިގެން މާފަންނު ސްޓޭޑިއަމްގެ އިރު އުތުރު ކަންމައްޗާހަމައަށެވެ. 

އަމީނީ މަގުގެ މަސައްކަތް ނިމޭ ވަރަކުން އެބައިތައް އަންނަނީ އާންމުންނަށް ހުޅުވާލަމުންނެވެ. އެގޮތުން، އަމީނީމަގު ބިލަބޮންގް ސްކޫލާ ހަމައަށް މިހާރު ވަނީ ހުޅުވާލާފަ އެވެ. 

އަމީނީ މަގަކީ މީގެކުރިން އަޑިގުޑަންތަކާއި ހެދި މަގު ބޭނުންކުރާ މީހުންނަށް ބޮޑެތި ތަކުލީފުތަކާއި ކުރިމަތިވެފައިވާ މަގެކެވެ. ނަމަވެސް ތާރު އަޅައި ޒަމާނީ ފެންވަރަށް ތަރައްޤީކުރުމުގެ ސަބަބުން މަގު ބޭނުންކުރާ މީހުންނަށް ވަނީ ބޮޑެތި ލުއިފަސޭހަތަކެއް ލިބިގެންގޮސްފައެވެ.

އަމީނީ މަގު ޒަމާނީ ފެންވަރަށް ތަރައްޤީކުރުމުގެ މަސައްކަތް ހަވާލުކުރީ 84.4 މިލިއަން ރުފިޔާއަށެވެ.