ނ. ހޮޅުދޫގެ ގެއެއްގެ ތެރޭގައި ޒަޚަމްތަކަކާއި އެކު މަރުވެފައި އޮތް އަންހެނަކު ފެނިއްޖެއެވެ.

ފުލުހުންގެ އިދާރާއިން ވިދާޅުވީ، ނ. ހޮޅުދޫގެ ގެއެއްގެ ތެރޭގައި އަންހެނަކު ޒަޚަމްވެފައި އޮތް ކަމަށް ލިބުނު މައުލޫމާތާއި ގުޅިގެން ފުލުުހުން އެގެއަށް ގޮސް އެއަަންހެންމީހާ އެރަށު ސިއްޙީމަރުކަޒަށް ގެންގޮސްފައިވާ ކަމަށެވެ. އަދި އެމީހާ ޞިއްޙީ މަރުކަޒަށް ގެންދިޔައިރުވެސް އޮތީ ނިޔާވެފައި ކަމަށް އެމަރުކަޒުން އެމީހާގެ ހަށިގަނޑު ބެއްލެވި ޑޮކްޓަރުން މައުލޫމާތު ދީފައިވާ ކަމުގައި ފުލުހުންގެ އިދާރާއިން ވިދާޅުވިއެވެ.

ފުލުހުންގެ އިދާރާއިން ވިދާޅުވީ، ނިޔާވި މީހާއަކީ އުމުރުން 50 އަހަރުގެ ދިވެހި އަންހެނެއް ކަމަށެވެ. އަދި މަރުގެ އެމައްސަލަ ފުލުހުން ތަޙްޤީޤު ކުރަމުންދާ ކަމުގައި ފުލުހުންގެ އިދާރާއިން ވިދާޅުވެފައި ވެއެވެ.

އެރަށުން މައުލޫމާތު ލިބިފައިވާ ގޮތުގައި ނިޔާވި އަންހެން މީހާއަކީ ނަފްސާނީ މައްސަލަތަކެއް ހުންނަ މީހެކެވެ. އަންހެންމީހާގެ ކަރު ވަރަށް ބޮޑަށް ޒަޚަމްވެފައި ހުރި އިރު އޭނާ ޒަޚަމްވެފައި އޮތް ތަނުގެ ކައިރިން ވަޅިއެއް ފެނުނު ކަމަށްވެސް މައުލޫމާތު ލިބިފައިވެއެވެ.