މީސްމިޑިއާގައި ފޮޓޯއާއި ވީޑިއޯ ލީކުކޮށް އަދި ބްލެކްމެއިލްގެ ޝިކާރައަށް ވެފައިވާ ފަރާތްތަކުން, އެމައުލޫމާތު ފުލުހުންނަށް ޙިއްޞާކުރުމަށް ފުލުހުންގެ އިދާރާއިން އެދިއްޖެއެވެ.

ޓެލެގްރާމް ޗެނަލްތައް ހަދައިގެން، އެ ޗެނަލްތަކުގައި، ބަރަހަނާ މަންޒަރު ދައްކުވައިދޭ ފޮޓޯއާއި ވީޑިއޯ އާއްމުކޮށް އެއިން މާލީ މަންފާ ހޯދަމުން ދިޔަ ބައެއްގެ މައުލޫމާތު މިއަދު ފުލުހުން ވަނީ އާއްމުކޮށްފައެވެ. ފުލުހުންގެ އިދާރާއިން ވަނީ، ބަރަހަނާ މަންޒަރު ދައްކުވައިދޭ ފޮޓޯއާއި ވީޑިއޯ ހިމެނޭ 571 ޗެނަލް ފުލުހުންގެ ބާރުގެ ދަށަށް ގެނެސް ހުއްޓުވާފައިވާ ކަން ހާމަކޮށްފައެވެ. ފުލުހުންގެ އިދާރާއިން ހާމަކޮށްފައިވާ ގޮތުގައި އެ ޓެލެގްރާމް ޗެނަލްތަކުގައި، ރާއްޖޭގެ އަންހެނުންގެ ބަރަހަނާ މަންޒަރު ދައްކުވައިދޭ 241،651 (ދެލައްކަ ސާޅީސް އެއްހާސް ހަސަތޭކަ ފަންސާއެއް އެކެއް) ފޮޓޯއާއި 86618 (އައްޑިހަ ހަހާސް ހަސަތޭކަ އަށާރަ) ވީޑިއޯ ޕޯސްޓްކޮށްފައިވެއެވެ. 

ފުލުހުންގެ އިދާރާއިން ވަނީ، މިގޮތަށް މީސްމިޑިއާގައި ފޮޓޯއާއި ވީޑިއޯ ލީކުކޮށް އަދި ބްލެކްމެއިލްގެ ޝިކާރައަށް ވެފައިވާ ފަރާތްތަކުން ސައިބަރ ކްރައިމް ސެންޓަރުގެ ނަންބަރު 9136262 އަށް މައުލޫމާތު ހިއްސާކޮށްދެއްވުމަށް އެދިފައެވެ. އަދި މިފަދަ ނޭދެވޭ އަމަލުތަކުގެ ޝިކާރައަކަށް ވިޔަ ނުދިނުމަށްޓަކައި، އަމަލުތައް އިސްލާހުކޮށް ވިސްނުންތެރިކަމާއެކު ޒިންމާދާރު މީހަކަށްވުމަށް ދިވެހި ފުލުހުންގެ ޚިދުމަތުން ވަނީ އިލްތިމާސްކޮށްފައެވެ.