Advertisement
ހޯމްލޭންޑް ސެކިއުރިޓީ އެންޑް ޓެކްނޯލޮޖީގެ ޕާމަނަންޓް ސެކްރެޓަރީ ހިންނާ ޚާލިދު --
ހޯމް މިނިސްޓްރީގެ ޕީއެސް އިސްތިއުފާ ދެއްވައިފި
ހޯމްލޭންޑް ސެކިއުރިޓީ އެންޑް ޓެކްނޯލޮޖީގެ ޕާމަނަންޓް ސެކްރެޓަރީ ކަމުގެ މަގާމުން ހިންނާ ޚާލިދު އިސްތިއުފާ ދެއްވައިފިއެވެ.
ހިންނާ ޚާލިދު މަޤާމުން އިސްތިއުފާ ދެއްވާފައިވާކަން، ހޯމްލޭންޑް ސެކިއުރިޓީ އެންޑް ޓެކްނޯލޮޖީން ވަނީ ކަށަވަރުކޮށްދީފައެވެ.
ހިންނާ ޚާލިދު މަޤާމުން އިސްތިއުފާ ދެއްވި ސަބަބެއް ހާމަކުރައްވާފައެއް ނުވެއެވެ. އެހެން ނަމަވެސް މަޤާމުން އިސްތިއުފާ ދެއްވިކަން އޭނާ ދޮގެއް ނުކުރައްވައެވެ.
ފަސް އަހަރު ދުވަހަށް ޢައްޔަނުކުރާ އެމަޤާމުގައި ހިންނާ ޚާލިދު މަސައްކަތް ކުރައްވާފައި ވަނީ އެންމެ 3 މަސް ދުވަހުގައެވެ. ހޯމްލޭންޑް ސެކިއުރިޓީ އެންޑް ޓެކްނޯލޮޖީގެ ޕާމަނަންޓް ސެކްރެޓަރީ ކަމުގެ މަގާމަށް ހިންނާ ޚާލިދު ޢައްޔަނުކުރައްވާފައި ވަނީ، މިއަހަރުގެ ޖޫން މަހުގެ 6 ވަނަ ދުވަހުގައެވެ.
ހިންނާ ވަނީ މީގެ ކުރިން، ކުރީގެ މިނިސްޓްރީ އޮފް އެޓޯލްސް އެޑްމިނިސްޓްރޭޝަންގައިވެސް މަސައްކަތް ކުރައްވާފައެވެ. އަދި ރައީސުލްޖުމްހޫރިއްޔާގެ އޮފީހުގެ އަންޑަރ ސެކްރެޓަރީގެ މަގާމާއި މާލޭ ސިޓީ ކައުންސިލުގެ ޒިންމާދާރު ވެރިޔާގެ މަގާމު ވެސް ފުރުއްވާފައިވާއިރު، ހޯމް އެފެއާޒްގެ ސްޕޯކްސްޕާސަންގެ މަގާމުވެސް ކުރިން އޭނާ ފުރުއްވާފައެވެ.
