62 ވަނަ ގައުމީ ޓޭބަލް ޓެނިސް މުބާރާތުގެ އަންހެން ސިންގަލްސްގެ ޗެމްޕިއަންކަން، ޖެހިޖެހިގެން 5 ވަނަ ފަހަރަށް ރާއްޖޭގެ އުއްމީދީ ތަރި ފާތިމަތު ދީމާ އަލީ ކާމިޔާބުކޮށްފިއެވެ. އުމުރުން 16 އަހަރުގެ ދީމާ މި ތަށި ކާމިޔާބު ކުރީ ސީދާ 4 ސެޓުން ފައިނަލް މެޗު ކާމިޔާބުކޮށްގެންނެވެ.

މާލޭގެ ކުޅިވަރު އެކުވެނީ ޓީޓީ ހޯލުގައި ހޮނިހިރު ދުވަހު ކުޅުނު ފައިނަލުގައި ދީމާއާ ދެކޮޅަށް ވާދަކުރީ އައިޝަތު ރަފާ ނާޒިމްއެވެ. ރަފާ އާއި ދެކޮޅަށް ދީމާ ސެޓުތައް ގެންދިޔައީ 11-08، 12-10، 11-03 އަދި 11-08 އިންނެވެ.

ސިންގަލްސް ޗެމްޕިއަންގެ އިތުރުން ދީމާ ވަނީ 19 އަހަރުން ދަށުގެ މިކްސް ޑަބަލްސް ޗެމްޕިއަންކަމާއި ޑަބަލްސް ޗެމްޕިއަންކަން ވެސް ހޯދާފައެވެ. މިކްސް ޑަބަލްސްގައި އޭނާގެ ޕެއާ އަކީ ފިރިހެނުންގެ ސިންގަލްސް ޗެމްޕިއަން އަހްޔާރު އަހުމަދު ހާލިދުއެވެ. އަދި ޑަބަލްސްގައި މިޝްކާ މުހައްމަދު އިބްރާހިމްއެވެ.

ގައުމީ މުބާރާތަށް ފަހު، ދީމާ އަށް ދެން މި އަހަރު އޮތް މުބާރާތްތަކީ، ތައިލެންޑާއި ވިއެޓްނާމްގައި އޮތް ޑަބްލިއުޓީޓީ މުބާރާތްތަކެވެ.

މިދިޔަ ދެ މަހެއްހާ ދުވަސްތެރޭ ދީމާ ވަނީ ގައުމީ ޓީމުގެ ރޭންކިން މުބާރާތުގެ އެއް ވަނަ އަނެއްކާ ވެސް ހޯދުމުގެ އިތުރުން، އެސޯސިއޭޝަން ކަޕްގެ ސިންގަލްސް ތަށި ދިފާއުކޮށްފައެވެ.