މިނިމުނު ހަފްތާގައި މާލެ ސަރަހައްދުގައި ހިނގި ބޮޑު ދެ އެކްސިޑެންޓެއްގައި ގާތްގާތުގައި ދެމީހަކު ނިޔާވުމުން، މަގުތަކުގެ ޓްރެފިކް ބަލަހައްޓަން އިތުރު ފުލުހުން ނެރެ އޮޕަރޭޝަންތައް ފަށައިފިއެވެ.

މިގޮތުން ފުލުހުން މިރޭ ވަނީ މާލޭގެ ސަރަހައްދުތަކާއި ހުޅުމާލޭގެ ސަރަހައްދުތަކުގައި އިތުރު ޗެކްޕޮއިންޓްތައް ޖަހައި ވެހިކަލްތައް ޗެކް ކުރަން ފަށާފައެވެ. 

ފުލުހުންގެ އިދާރާއިން ވިދާޅުވީ،  މަގުމަތީގެ ސަލާމަތާއި ރައްކާތެރިކަން ކަށަވަރު ކުރުމަށް ފުލުހުން ކުރަމުންދާ މަސައްކަތްތަކުގެ ތެރެއިން މާލެ އާއި ހުޅުމާލޭގެ އެކި ސަރަހައްދުތަކުގައި ވެހިކަލް ޗެކްޕޮއިންޓްތައް ގާއިމުކޮށް އުޅަނދުފަހަރު ބަލައި ފާސްކުރުމުގެ އިތުރުން، މަގުމަތީގެ ރައްކާތެރިކަމަށް ހާއްސަ ސަމާލުކަމެއް ދިނުމަށް ރައްޔިތުންނަށް ނަސޭހަތްތެރިވެ، ހޭލުންތެރިކަން އިތުރުކުރުމުގެ މަސައްކަތް ކުރަމުން ގެންދާ ކަމަށެވެ.

އަދި އެއްގަމު އުޅަނދު ބޭނުން ކުރުމުގެ ކުރިން ރައްކާތެރި ކަމުގެ ގޮތުން ފުރިހަމަ ކުރަންޖެހޭ އެންމެހާ ކަންކަން ފުރިހަމަކަން ޔަގީން ކުރެއްވުމަށްވެސް ފުލުހުން ވަނީ އިލްތިމާސްކޮށްފައެވެ.

ހުކުރު ދުވަހުގެރޭ ހުޅުމާލޭގައި ހިނގި އެކްސިޑެންޓްގައި 23 އަހަރުގެ ޒުވާނަކު ނިޔާވި އިރު، ބުދަ ދުވަހުގެ ރޭ މާލޭގައި ހިނގި އެކްސިޑެންޓްގައި އަނިޔާވި 21 އަހަރުގެ ޒުވާނަކު މިއަދު ވަނީ ނިޔާވެފައެވެ. މީގެ އިތުރުން މިއަދުވެސް މާލޭގެ ބޮޑުތަކުރުފާނު މަގުގައި ބޮޑު އެކްސިޑެންޓެއް ހިނގައި ތިން މީހަކަށް އަނިޔާވިއެވެ.