62 ވަނަ ގައުމީ ޓޭބަލް ޓެނިސް މުބާރާތުގެ ފިރިހެން ސިންގަލްސްގެ ފައިނަލުގައި، އެ ތަށި 11 ފަހަރު ހޯދާފައިވާ މޫސާ މުންސިފް ބަލިކުރުމަށްފަހު، 16 އަހަރުގެ ޒުވާން ކުޅުންތެރިޔާ، އަހްޔާރު އަހުމަދު ހާލިދު ޗެމްޕިއަންކަން ހޯދައިފިއެވެ.

މާލޭގެ ކުޅިވަރު އެކުވެނީ ޓީޓީ ހޯލުގައި ހޮނިހިރު ދުވަހު ކުޅުނު ފައިނަލުގެ ފުރަތަމަ 3 ސެޓު ގެންދިޔައީ އަހްޔާރުއެވެ. އެއީ 12-10، 11-1 އަދި 11-08 އިންނެވެ. ނަމަވެސް، ސީދާ ހަތަރު ސެޓުން އަހްޔާރަށް މެޗު ނުގެންދެވުނީ، ޖެހިގެން އައި 3 ސެޓު މުންސިފް ގެންދިއުމުންނެވެ. މި ސެޓުތައް މުންސިފް ކާމިޔާބު ކުރީ 08-11، 05-11 އަދި 06-11 އިންނެވެ.

އަހްޔާރު މެޗު ކާމިޔާބު ކުރީ ފަހު ސެޓު 11-07 އިން ކާމިޔާބު ކޮށްގެންނެވެ. އެހެންކަމުން، މި މެޗަށް އައިއިރު، އެސޯސިއޭޝަން ކަޕްގެ ސިންގަލްސް ޗެމްޕިއަންކަމާއި ގައުމީ ރޭންކިންގެ އެއް ވަނަ ހޯދައިފާ މުންސިފަށް މިއީ މި މުބާރާތުގެ ފައިނަލުން ނާކާމިޔާބީއާ ކުރިމަތިލާން ޖެހުނު ވިދިވިދިގެން ތިން ވަނަ ފައިނަލެވެ.

މީގެ އިތުރުން އަހްޔާރު ވަނީ 19 އަހަރުން ދަށުގެ ސިންގަލްސް ޗެމްޕިއަންކަމާއި 19 އަހަރުން ދަށުގެ މިކްސް ޑަބަލްސް ޗެމްޕިއަންކަން ވެސް ހޯދާފައެވެ. މިކްސް ޑަބަލްގައި އޭނާގެ ޕެއާރ އަކީ ފާތިމަތު ދީމާ އަލީއާއެވެ.