ޔޫއެފާ ނޭޝަންސް ލީގުގައި ބުރާސްފަތި ދުވަހުގެ ރޭ ޕޯޗުގަލް އިން ކޮރޭޝިއާ 2-1 އިން  ބަލިކުރި މެޗުގައި ކާމިޔާބުކުރި ގޯލާއެކު، ކްރިސްޓިއާނޯ ރޮނާލްޑޯގެ ޕްރޮފެޝަނަލް ކެރިއަރުގައި އޭނާ ޖަހާފައިވާ ގޯލުގެ އަދަދު 900 އަށް އަރައިފިއެވެ.

ޕޯޗުގަލްގެ ލިޒްބަންގައި ކުޅުނު މި މެޗުގައި ރޮނާލްޑޯގެ ގޯލު ފެނިގެން ދިޔައީ މެޗުގެ 34 ވަނަ މިނެޓުގައެވެ. އެއީ ނޫނޯ މެންޑޭޒްގެ ގޯލުގެ ކުރިމައްޗަށް ފޮނުވާލި ހުރަހެއް، ބިމުގައި ނުޖެހެނީސް ކަނާތު ފައިން ގޯލުގެ ދާގަނޑުގެ ތެރެއަށް ފޮނުވާލައިގެން އޭނާ ކާމިޔާބުކުރި ގޯލެކެވެ. މި ގޯލާއެކު، ބެލޮން ޑިއޯ 5 ފަހަރު ކާމިޔާބުކޮށްފައިވާ ރޮނާލްޑޯއަށް ރޮވުނުތަން ފެނުނެވެ. އަދި މޫނުމަތީގައި އަތް އަޅައިގެން އޭނާ ރޮމުން ވެއްޓިގަތްތަން ވެސް ފެނުނެވެ.

ގޯލު ޖެހުަމަށްފަހު ރޮނާލްޑޯ، ފޮޓީ: ގެޓީ

900 ގޯލާއެކު ރޮނާލްޑޯ އަކީ މިހާތަނަށް ކެރިއަރުގައި އެންމެ ގިނަ ގޯލު ޖަހާފައިވާ ކުޅުންތެރިޔާއެވެ. މީގެ އިތުރުން ކޮރޭޝިއާ ކޮޅަށް ޖެހި ގޯލާއެކު، ޕޯޗުގަލްގެ ޖާޒީގައި އޭނާ ޖަހާފައިވާ ގޯލުގެ އަދަދު ވަނީ 131 އަށް އަރާފައެވެ. ގައުމީ ޖާޒީގައި މި އަދަދަށް އަދި އިތުރު ކުޅުންތެރިއަކަށް ގޯލު ކާމިޔާބު ކޮށްދެވިފައެއް ނުވެއެވެ.

ރޮނާލްޑޯއާ އެންމެ ވާދަވެރި ލިއޮނެލް މެސީ އޮތީ 842 ގޯލާއެކު، ކެރިއަރުގައި މިހާތަނަށް އެންމެ ގިނަ ގޯލު ކާމިޔާބުކުރި ކުޅުންތެރިގެ ލިސްޓުގެ ދެވަނައިގައި ކަމަށް އީއެސްޕީއެން އިން ރިޕޯޓުކޮށްފައި ވެއެވެ. އަދި ތިން ވަނައިގައި އޮތީ، 765 ގޯލާއެކު ބްރެޒިލްގެ ޕެލޭއެވެ.

މީގެ އިތުރުން، ރޮނާލްޑޯ އަކީ މިހާތަނަށް ޗެމްޕިއަންސް ލީގުގައި ވެސް އެންމެ ގިނަ ގޯލު ކާމިޔާބު ކޮށްފައިވާ ކުޅުންތެރިޔާއެވެ. މިކަން ފާހަގަކޮށް ޔޫއެފާ އިން ވަނީ މިދިޔަ ހަފްތާ އޭނާއަށް އެވޯޑެއް ވެސް އަރުވާފައެވެ. ފަސް ފަހަރު ޗެމްޕިއަންސް ލީގު ކާމިޔާބުކޮށްފައިވާ ރޮނާލްޑޯ ވަނީ ޗެމްޕިއަންސް ލީގުގައި 141 ގޯލު ކާމިޔާބުކޮށްފައެވެ.

ޕޯޗުގަލްގެ ސްޕޯޓިން ލިޒްބަންއިން ފުޓުބޯޅަ ކެރިއަރު ފެށި ރޮނާލްޑޯ މެންޗެސްޓާ ޔުނައިޓެޑަށް ބަދަލުވީ 2003 ވަނަ އަހަރުއެވެ. މެންޗެސްޓާގައި 6 ސީޒަން ހޭދަކުރުމަށްފަހު ދެން އޭނާ ބަދަލުވީ ސްޕެއިންގެ ރެއާލް މެޑްރިޑަށެވެ. މެޑްރިޑަށް އޭނާ ކުޅެދިން 450 މެޗުން އޭނާ ވަނީ 438 ގޯލު ކާމިޔާބުކޮށްފައެވެ. އޭގެ ފަހުން އިޓަލީގެ ޖުވުންޓަސްއަށް ދެ އަހަރު ކުޅުމަށްފަހު، ރޮނާލްޑޯ ވަނީ ޔުނައިޓެޑަށް އެނބުރި ގޮސްފައެވެ. ނަމަވެސް ޔުނައިޓެޑްގެ ކޯޗު، އެރިކް ޓެން ހެގް އާ ކުރިމަތިވި މައްސަލަތަކެއްގައި އޭނާ މެންޗެސްޓަރ ދޫކޮށްލިއެވެ. އަދި އޭގެ ފަހުން ސައުދީ ޕްރޯ ލީގުގެ އަލް-ނަސްރުއަށް ބަދަލުވުމަށްފަހު އަދި ވެސް ކުޅެމުން އަންނަނީ އެ ކްލަބަށެވެ.