ފުލުހުންގެ ބެލުމުގެ ދަށުގައި ހުއްޓައި ދަންޖެހިގެން މަރުވިކަމަށް ބުނާ، ށ. މިލަންދޫ ހެޕީލޭންޑް، އާދަމް އަޠުހަރު (32އ)ގެ މަރުގ ސަބަބު ދެނެގަތުމަށްޓަކައި އޭނާގެ ހަށިގަނޑު އިންޑިއާއަށް ފޮނުވައިފިއެވެ.

އަޠުހަރު މަރުވީ މި ސެޕްޓެމްބަރު މަހުގެ 2 ވަނަ ދުވަހުގެ ހަވީރުގައެވެ. އޭނާ މަރުވީ، ދޫނިދޫގައި އޭނާ ބަންދުކޮށްފައި ހުރި ގޮޅީގެ ތެރޭގައި ދަންޖެހުމުގެ ސަަބަބުން ފަރުވާ ދިނުމަށް އައިޖިއެމްއެޗް ހޮސްޕިޓަަލަށް ގެނެސްފައި ވަނިކޮށެވެ. 

ފުލުހުން އަތުހަރު ހައްޔަރުކުރީ، އޮގަސްޓް 29 ވަނަ ދުވަހުގެ ރޭ މާލޭގައި އަންހެނަކު ހިފަހައްޓައި ރަހީނުކޮށްގެން އުޅެނިކޮށް، އޭނާގެ އަތްދަށުން އެއަންހެންމީހާ ސަލާމަތްކުރުމަށްފަހުގައެވެ. އޭނާގެ އަތްދަށުން އަންހެންމީހާ ސަލާމަތްކުރުމަށް، ފުލުހުންގެ މުގުރަކުން ފުލުހަކު އަޠުހަރުގެ ބޮލުގައި ޖެހުމުގެ ސަބަބުން، އަޠުހަރުގެ ބޮލަށް ވަރަށް ބޮޑަށް އަނިޔާވިއެވެ. އެހާދިސާގައި ލިބުނު އަނިޔާތަކަށް ފަރުވާ ދިނުމަށްފަހު، އޭނާ ދޫނިދޫއަށް ގެންގޮސް ދޫނިދޫ ގޮޅީގައި ބަންދުކޮށްފައި ހުއްޓައި ދަންޖެހުނުކަމަށް ފުލުހުން ހާމަކުރީ، މިމަހުގެ އެއްވަނަ ދުވަހުގެ ރޭ 19:40 އިރުގައެވެ. 

ފުލުހުން ފަހުން ހާމަކޮށްފައިވާ މައުލޫމާތުން އެނގުނު ގޮތުގައި އަތުހަރު ދަންޖެހި ހަރަކާތެއްނެތި ގޮޅީތެރޭގައި އޮއްވައި ފެނިފައި ވަނީވެސް އޭނާ ދަންޖެހުނުތާ 30އަށް މިނިޓްވެސްވީ ފަހުންނެވެ.

އަޠުހަރު މަރުވާން ދިމާވި ހާދިސާ، ނޭޝަނަލް އިންޓަރގްރިޓީ ކޮމިޝަނުންނާއި، އެޗްއާރްސީއެމްއިން ދަނީ ތަޙްޤީޤު ކުރަމުންނެވެ.