އިންޑިއާއިން ދިވެހިރާއްޖެއަށް ހަދިޔާކޮށްފައި އޮތް ޑޯނިއާ އަސްކަރީ މަތިންދާބޯޓާއި، ހެލިކޮޕްޓަރުތަކުގައި ކުރަމުން އައި މެޑިކަލް އިވަކުއޭޝަންގެ ދަތުރުތައް އަލުން ފަށާފައި ވީނަމަވެސް އެދަތުރުތަކާއި ގުޅޭ މައުލޫމާތު އާއްމުކުރުން އެމްއެންޑީއެފުން ހުއްޓާލައިފިއެވެ.

މިސަރުކާރު ވެރިކަމަށް އައުމަށްފަހުގައި، މެޑިކަލް އިވަކުއޭޝަންތަކުގައި ޑޯނިއާ މަތިންދާ ބޯޓާއި ހެލިކޮޕްޓަރުތައް ބޭނުން ކުރުން ހުއްޓާލުމަށްފަހު، އެއާ އެމްބިއުލާންސްގެ ގޮތުގައި މޯލްޑިވިއަންގެ ޑޭޝް-8 މަރުކާގެ މަތިންދާ ބޯޓަކާއި، މޯލްޑިވިއަންގެ ސީޕްލޭނެއް ބޭނުން ކުރަންފެށިއެވެ. ޑިމާންޑް ނެތްކަމަށް ބުނެ އެއާ އެމްބިއުލާންސްގެ ގޮތުގައި ޚާއްޞަކުރި ސީޕްލޭން މިދިޔަމަހު ވަނީ ދަވާދު ބަދަލުކޮށް އާއްމު ދަތުރުތަކުގައި ބޭނުން ކުރަންފަށާފައެވެ.

އިންޑިއާއިން ދިވެހިރާއްޖެއަށް ހަދިޔާކޮށްފައި އޮތް ޑޯނިއާ އަސްކަރީ މަތިންދާބޯޓާއި، ހެލިކޮޕްޓަރުތައް، ޞިއްޙީ ކުއްލި ހާލަތުގައި ކުރަންޖެހޭ ދަތުރުތަކުގައި އަލުން ބޭނުން ކުރަން ފަށާފައިވާކަމަށް ރައީސުލްޖުމްހޫރިއްޔާ، ޑރ. މުހައްމަދު މުޢިއްޒު ހާމަކުރެއްވީ، މިއަހަރުގެ މިނިވަންދުވަހުގެ ރަސްމީ ޖަލްސާގައި ދެއްކެވި ވާހަކަފުޅުގައެވެ. ޞިއްޙީ ކުއްލި ހާލަތުގައި ކުރަންޖެހޭ ދަތުރުތަކުގައި،  ޑޯނިއާ އަސްކަރީ މަތިންދާބޯޓާއި، ހެލިކޮޕްޓަރުތައް ބޭނުންކުރާތާ އެއްމަސްދުވަސް ވެގެން ދިޔަ ނަމަވެސް، ކުރިން އާއްމުކުރަމުން އައި ގޮތަށް އެފަދަ ދަތުރުތަކުގެ މައުލޫމާތު އާއްމުކުރުން އެމްއެންޑީއެފުން ވަނީ ހުއްޓާލާފައެވެ. އަދި އެ މައުލޫމާތު އާއްމުކުރުން ހުއްޓާލި ސަބަބެއް އެމްއެންޑީއެފުން ބުނެފައެއް ނުވެއެެވެ.

އެންމެ ފަހުން، ޑޯނިއާ އަސްކަރީ މަތިންދާބޯޓާއި، ހެލިކޮޕްޓަރުގައި ކުރި ބަލިމީހުން އުފުލުމުގެ ދަތުރެއްގެ މައުލޫމާތު މީޑިއާއަށް އެމްއެންޑީއެފުން ހާމަކޮށްފައި ވަނީ، ހުސްވި އަހަރުގެ ސެޕްޓެމްބަރު މަހުގެ 13 ވަނަ ދުވަހުގައެވެ. އެއީ އައްޑޫ އިކުއެޓޯރިއަލް ހޮސްޕިޓަލުން ހެލިކޮޕްޓަރުގައި މީހަކު މާލެ ގެނައުމަށް ކުރި ދަތުރެވެ. ޑޯނިއާ ފްލައިޓްގައި ކުރި ދަތުރުތަކުގެ ތެރެއިން އެންމެ ފަހުން މައުލޫމާތު އާއްމުކޮށްފައި ވަނީ، 11 ސެޕްޓެމްބަރު 2023ގައި، ގދ. ތިނަދޫއިން 2 އަހަރުގެ ކުޑަކުއްޖަކު މާލެ ގެނައުމަށް ކާޑެއްދޫ އެއާޕޯޓުން މާލެއަށް ކުރި ދަތުރުގެ މައުލޫމާތެވެ.

ސަރުކާރުން ހާމަކޮށްފައިވާ ގޮތުގައި، ޑޯނިއާ އަސްކަރީ މަތިންދާބޯޓާއި، ހެލިކޮޕްޓަރުތައް ދުއްވައި އަދި އެއުޅަނދުތައް ބެލެހެއްޓުން މިހާރު ހަވާލުކޮށްފައި އޮތީ، އިންޑިއާގެ މަދަނީންގެ ތެރެއިން އިންޑިއާ އަސްކަރިއްޔާއިން ކަނޑައަޅާފައިވާ ބަޔަކަށެވެ.

ޑޯނިއާ އަސްކަރީ މަތިންދާބޯޓާއި، ހެލިކޮޕްޓަރުތަކުގައި ބަލިމީހުން އުފުލުމުގެ ދަތުރުތަކާއި ގުޅޭ މައުލޫމާތު އާއްމު ނުކުރި ނަމަވެސް ސީއެމްބިއުލާންސްތަކުގައި ބަލިމީހުން އުފުލުމަށް ކުރާ ދަތުރުތަކާއި ގުޅޭ މައުލޫމާތު އެމްއެންޑީއެފުން އާއްމުކުރަމުން ގެންގޮސްފައިވެއެވެ.