ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒު ކަންކަން ނިންމަވަނީ، އެކަމަކާއި ގުޅޭ ހުރިހާ ފަރާތްތަކާއި މަޝްވަރާކުރައްވައި ޚިޔާލު ހޯއްދަވައިގެން ކަމުގައި ފިޝަރީޒް މިނިސްޓަރ އަޙްމަދު ޝިޔާމް ވިދާޅުވެއްޖެއެވެ.

މިނިސްޓަރ ޝިޔާމް މިހެން ވިދާޅުވީ، ލޭނު މަސްވެރިކަމަށް ހުއްދަ ދިނުމަށް ކުރިން ނިންމެވި ނިންމެވުން ބަދަލުކޮށް، ރައީސުލްޖުމްހޫރިއްޔާ ލޭނު މަސްވެރިކަމަށް ހުއްދަ ނުދޭން ނިންމެވީ ފިޝަރީޒް މިނިސްޓަރާއި މަޝްވަރާ ނުކުރައްވައި، ކަމަށް ރާއްޖޭގެ ނޫހަކުން ރިޕޯޓުކުރުމާއި ގުޅިގެން އެކަމަށް ރައްދުދެއްވައި އެކްސްގައި ކުރެއްވި ޕޯސްޓުގައެވެ. މިނިސްޓަރ ޝިޔާމް ވިދާޅުވީ، ރާއްޖޭގެ ވެރިކަން ކުރެއްވި ވަރަށްގިނަ ރައީސުން އެމަނިކުފާނަށްވެސް ތަޖުރިބާ ކުރެވިއްޖެ ކަމަށާއި، ރައީސް ޑރ. މުއިއްޒު އާއެކު ތަޖުރިބާ ކުރެވެނީ، އެމަނިކުފާނަކީ، މަޝްވަރާ ކުރައްވަން ޖެހޭ ކަންކަމުގައި މަޝްވަރަާ ކުރައްވަންޖެހޭގޮތަށް މަޝްވަރާ ކުރައްވަންޖެހޭ ފަރާތްތަކާ އަދި މަޝްވަރާ ކުރައްވަން ޖެހޭ މިންވަރަށް މަޝްވަރާ ކުރައްވާ ބޭފުޅެއްގެ ގޮތުގައިކަމަށެވެ.

ރައީސުލްޖުމްހޫރިއްޔާ އިއްޔެ ވަނީ، ބޮޑުކަންނެލި މަސްވެރިންގެ ޔޫނިއަން (ބީ.ކޭ.އެމް.ޔޫ) ގެ އިސް ބޭފުޅުންނާ ބައްދަލުކުރައްވާފައެވެ. އެބައްދަލުކުރެއްވުމުގައިވެސް މިނިސްޓަރ އޮފް ފިޝަރީޒް އެންޑް އޯޝަން ރިސޯސަސް، އަޙްމަދު ޝިޔާމް ބައިވެރިވެވަޑައިގެންނެވިއެވެ. އެބައްދަލުވުމުގައި ލޭނުގެ މަސްވެރިކަމަށް ހުޅުވައި ނުލުމަށް ރައީސް ނިންމެވި ނިންމެވުމަށް، (ބީ.ކޭ.އެމް.ޔޫ)އިން ވަނީ ޝުކުރުދަންނަވާފައެވެ.