މިމަހުގެ 29 ވަނަ ދުވަހު، މާލެ އަތޮޅު ހުވަފެންފުށި ރިޒޯޓުކައިރީގައި ހިއްކާފައި އޮތް ފަސްގަނޑަކަށް ދަތުރުގޮސް އުޅެނިކޮށް, މ. އަސަރީހަނދާން، ތަސްލީމް މުޙައްމަދު (43އ) ގެއްލުނު މައްސަލަ ޖިނާޢީ މައްސަލައެއްގެ ގޮތުގައި ތަޙްޤީޤުކުރަން ފަށާފައިވާ ކަމުގައި ފުލުހުންގެ އިދާރާއިން ވިދާޅުވެއްޖެއެވެ.

ފުލުހުން މީޑިއާތަކަށް ފޮނުވި މެސެޖުގައި ވިދާޅުވީ، ތަސްލީމް ގެއްލުނު މައްސަލައިގައި ޝައްކު ކުރެވޭ ކަންތައްތަކެއް ހުރުމުން އޭނާ ގެއްލުނު މައްސަލަ މިހާރު ޖިނާޢީ މައްސަލައެއްގެ ގޮތުގައި ބަލަން ފަށާފައިވާ ކަމަށެވެ. އަދި ތަސްލީމް ހޯދުމުގެ މަސައްކަތް ހުއްޓާނުލައި ކުރިޔަށް ގެންދާ ކަމުގައިވެސް ފުލުހުންގެ އިދާރާއިން ވިދާޅުވިއެވެ.

ތަސްލީމް ގެއްލުނު ކަމަށް ރިިޕޯޓް ކުރި ހާދިސާ އާއި ގުޅިގެން އެމްއެންޑީއެފުންވެސް ވިދާޅުވީ، ތަސްލީމު ގެއްލުނީ މޫދަށް ކަމެއް ޔަޤީން ނުވާ ކަމަށެވެ. އެހެން ނަމަވެސް އޭނާ ދަތުރު ދިޔަކަމަށް ބުނާ ފަސްގަނޑުގެ ވަށައިގެން މޫދު ސަރަހައްދުގެ 5000 މީޓަރާއި އަދި 3000 މީޓަރުގެ ސަރަހައްދެއް ބަލާފައިވާ ކަމުގައި އެމްއެންޑީއެފުން ވިދާޅުވެފައިވެއެވެ. 

ތަސްލީމަކީ، މާލޭ ސިޓީ ކައުންސިލްގައި ވަޒީފާ އަދާކުރަމުން ދިޔަ މީހެކެވެ. ތަސްލީމް ގެއްލުނުކަމަށް ބުނާ ދަތުރުގައި އޭނާ އާއިއެކު ދިޔައީ ކޮންބައެއް ކަމެއް މިހާތަނަށް އަދި ހާމަކޮށްފައެއް ނުވެއެވެ.