ފުވައްމުލައް ސިޓީއަށް ކުރެއްވި ކެމްޕޭން ދަތުރުފުޅު ނިންމަވާލެއްވުމަށްފަހު، ރައިސުލްޖުމްހޫރިއްޔާ އިބްރާހިމް މުޙައްމަދު ޞާލިޙް މިއަދު ށ އަތޮލަށް ވަޑައިގެންފިއެވެ.

ރައީސުލްޖުމްހޫރިއްޔާ ކެމްޕޭން ދަތުރުފުޅުގައި ށ. އަތޮޅަށް ވަޑައިގެންނެވީ، ސީދާ ފުވައްމުލަކުންނެވެ.

އެންމެ ފުރަތަމަ އެމަނިކުފާނު ވަޑައިގެންނެވީ، ށ. ފުނަދޫއަށެވެ. ފުނަދޫއިން ރައީސް ޞާލިޙަށް ވަނީ ހޫނު މަރުހަބާއެއް ދަންނަވާފައެވެ. ފުނަދޫ ރައްޔިތުންނާއި ބައްދަލުކޮށްލެއްވުމުގެ އިތުރުން ރައީސުލްޖުމްހޫރިއްޔާ ވަނީ، ‏ ފުނަދޫ ދަނޑު ހުޅުވައިދެއްވާފައެވެ.

ފުނަދޫއަށްފަހު ރައީސް ދެން ވަޑައިގެންނެވީ އެއަތޮޅު މާއުނގޫދޫއަށެވެ. އެރަށުގެ ރައްޔިތުންގެ ފަރާތުންވެސް އެމަނިކުފާނަށް ވަނީ ހޫނު މަރުހަބާއެއް ދަންނަވާފައެވެ. މާއުނގޫދޫގެ އިތުރުން އެއަތޮޅު ޅ. މަގަށްވެސް މިއަދު ހަވީރު ރައީސް ވަޑައިގެންނެވިއެވެ.

ސަރުކާރުން ށ. އަތޮޅުގެ ރަށްރަށުގެ ތަރައްޤީއަށް ވަނީ، 159 މަޝްރޫއެއް ހިންގާފައެވެ. އެއީ އޭގެ ކުރީގެ ދައުރުގައި ހިންގި މަޝްރޫޢުތަކުގެ ތިންގުނަ އިތުރު އަދަދެކެވެ. އަދި މިދައުރުގައި ށ އަތޮޅުގެ ތަރައްޤީއަށް ސަރުކާރުން ވަނީ، 1.03 ބިލިޔަން ރުފިޔާ ހޭދަކުރައްވާފައެވެ.