އިންޓަރނޭޝަނަލް އެޓޮމިކް އެނަރޖީ އޭޖެންސީ (އައި.އޭ.އީ.އޭ) ގައި ދިވެހިރާއްޖެއިން ބައިވެރިވުމާއި ގުޅޭ ގޮތުން ރައްޔިތުންގެ މަޖިލީހުގެ ރުހުން ހޯއްދެވުމަށް ރައީސުލްޖުމްހޫރިއްޔާ ނިންމަވައިފިއެވެ.

ރައީސުލްޖުމްހޫރިއްޔާ މިގޮތަށް ނިންމެވީ، އިއްޔެ ބޭއްވެވި ވަޒީރުންގެ މަޖިލީހުގެ ބައްދަލުވުމުގައި، އެކަމާއި ގުޅޭ ގޮތުން ފޮރިން މިނިސްޓަރ ހުށައެޅުއްވި ކަރުދާހަށް މަޝްވަރާކުރެއްވުމަށްފަހުގައި، ވަޒީރުންގެ މަޖިލީހުގެ ލަފާފުޅުގެ މަތީންނެވެ. ޤާނޫނުއަސާސީގެ 93 ވަނަ މާއްދާގެ (ހ)ގައި ބަޔާންކޮށްފައިވާ ގޮތުން، ރާއްޖެއަށް އެއްވެސް ބައިނަލްއަޤުވާމީ މުއާހަދާއެއްގައި ސޮއެކުރެވޭނީ، ރައްޔިތުންގެ މަޖިލީހަށް ހުށައަޅައި އެމަޖިލީހުގެ ރުހުން ލިބިގެންނެވެ. 

އިންޓަރނޭޝަނަލް އެޓޮމިކް އެނަރޖީ އޭޖެންސީ (އައި.އޭ.އީ.އޭ) ގައި ދިވެހިރާއްޖެއިން ބައިވެރިވުމަށް ވަޒީރުންގެ މަޖިލީހުން އިއްޔެ ނިންމެވި ނިންމެވުމާއި ގުޅޭ މައުލޫމާތު ޙިއްޞާކުރައްވަމުން، ފޮރިން މިނިސްޓަރ މޫސާ ޒަމީރު ވިދާޅުވީ، އެމުހާދާގައި ރާއްޖެއިން ބައިވެރިވުމަށް ނިންމީ، އެމުއާހަދާގައި ބައިވެރިވެފައިވާ ޤައުމުތަކަށް ލިބިދޭ އިނާޔަތްތައް ރާއްޖެއިންވެސް ހޯދުމަށްޓަކައި ކަމަށެވެ. އަދި ދުނިޔޭގެ 178 ޤައުމަކުން މިހާރު އެ މުއާހަދާަގައި ބައިވެރިވެފައިވާ އިރު، ދެކުނު އޭޝިއާގެ ޤައުމުތަކުގެ ތެރެއިން މިހާތަނަށް އެމުއާހަދާގައި ބައިވެރި ނުވެ އޮތީ ދިވެހިރާއްޖެއާ ބޫޓާނުންކަންވެސް ފޮރިން މިނިސްޓަރ ފާހަގަކުރެއްވިއެވެ. މުޅި ދުނިޔެއިންވެސް އެމުއާހަދާގައި ބައިވެރިނުވެ އޮތީ 17 ޤައުމަކުންނެވެ.

މިނިސްޓަރ މޫސާ ޒަމީރު ވިދާޅުވީ، މި މުއާހަދާގައި ރާއްޖެއިން ބައިވެރިވުމަކީ، ކެންސަރު ހޮސްޕިޓަލް އެޅުމުގެ މަސައްކަތަށް ބޭރުގެ އެހީ ލިބުމަށް މަގުފަހިވެގެންދާނެ ކަމެއް ކަމަށެވެ.

ނިއުކުލިއަ ހަތިޔާރާއި ހަކަތަ އާއި އީޖާދުތަކަކީ، އިންސާނުގެ ސިއްޙަތަށް ގެއްލުންދޭ އެއްޗަކަށްވާތީ، ނިއުކުލިއަ އުފެއްދުންތައް ރެގިއުލޭޓް ކުރުމަށް އިންޓަރނޭޝަނަލް އެޓޮމިކް އެނަރޖީ އޭޖެންސީ އުފައްދާފައި ވަނީ 1957 ވަނަ އަހަރުގައެެވެ.