ފުލުހުންގެ ބެލުމުގެ ދަށުގައި ހުއްޓައި އަމިއްލައަށް މަރުވާން މަސައްކަތް ކުރި އާދަމް އަޠުހަރަށް ފަރުވާދެމުން ގެންދަނީ، ވެންޓިލޭޓަރުގައި ބާއްވައިގެން ކަމުގައި ފުލުހުންގެ އިދާރާއިން ވިދާޅުވެއްޖެއެވެ.

ފުލުހުންގެ އިދާރާއިން ވިދާޅުވީ، އަޠުހަރު އޮތީ، އައިޖީއެމް ހޮސްޕިޓަލުގެ އައިސީޔޫގައި ކަމަށެވެ. އަދި ދޫނިދޫ ކަސްޓޯޑިއަލްގައި އޭނާ ހުއްޓައި އަމިއްލައަށް މަރުވާން މަސައްކަތް ކުރުމާއި ގުޅިގެން، ނެޝަނަލް އިންޓަރގްރިޓީ ކޮމިޝަނުންނާއި، ހިއުރައިޓްސް ކޮމިޗަން އޮފް މޯލްޑިވްސްއިން އެކަން ބަލައި ތަޙްޤީޤުކުރަން ފަށާފައިވާ ކަމަށެވެ.

އަޠުހަރު ހައްޔަރުކޮށްފައި ވަނީ، ބުރާފަސްތި ދުވަހުގެ ރޭގައި މާލޭގައި އަންހެނަކު ރަހީނުކޮށް، މަރާލާނެ ކަމަށް ބުނެ ބިރުދައްކަމުން ދަނިކޮށެވެ. އޭނާގެ އަތްދަށުން އަންހެންމީހާ ސަލާމަތް ކުރުމަށް ފުލުހުން ކުރި މަސައްކަތުގައި އަޠުހަރަށްވެސް އަނިޔާވިއެވެ. އަދި އެނާއަށް އޭޑީކޭ ހޮސްޕިޓަލާއި، އައިޖީއެމް ހޮސްޕިޓަލްގައިވެސް ފަރުވާ ދިނެވެ. 

ފުލުހުންގެ އިދާރާއިން ހާމަކޮށްފައިވާ ގޮތުގައި އަޠުހަރު އަމިއްލައަށް މަރުވާން މަސައްކަތްކޮށްފައި ވަނީ އޭނާ ދޫނިދޫ ކަސްޓޯޑިއަލްގައި ބަހައްޓާފައި ހުއްޓައެވެ. ރަހީނުކުރުމުގެ ހާދިސާގެ ތެރޭގައި ފުލުހުން ޢަމަލުކުރި ގޮތަށްވެސް ބައެއް ފަރާތްތަކުގެ ފާޑުކިޔުންތައް ވަނީ އަމާޒު ވެފައެވެ.