އިޒްރޭލުން ފަލަސްޠީނުގެ ރައްޔިތުންނާއި ދެކޮޅަށް ހިންގަމުންދާ ޤަޠުލުއާއްމާއި ދެކޮޅު ހެދުމުގެ ގޮތުން ސަޢޫދީ އެމްބަސީ ކައިރީގައި އަޑު އުފުލަމުން ދިޔަ އާއިޝަތު ޝާދިޔާ އާއި ޑރ. ޝަޒްރާ އިބްރާހިމްގެ ބަންދަށް އިތުރު 5 ދުވަސް ޖަހައިފިއެވެ.

އެދެމީހުންގެ ބަންދަށް އިތުރު 5 ދުވަސް ޖެހީ، އެމީހުންގެ ބަންދުގެ މުއްދަތު އިތުރުކޮށްދޭން ފުލުހުން އެދުމުންނެވެ. އޮގަސްޓް 28 ވަނަ ދުވަހު އާއިޝަތު ޝާދިޔާ އާއި ޑރ. ޝަޒްރާ އިބްރާހިމް ހައްޔަރުކޮށް ފުރަތަމަ އެމީހުންގެ ބަންދަށް ޖަހާފައި ވަނީ، 3 ދުވަހުގެ މުއްދަތެވެ.

އެދެ އަންހެނުން ހައްޔަރުކޮށްފައި ވަނީ، ޞުލްހަވެރިކަމާއި އެކު އެއްވެ އުޅުމުގެ މިނިވަންކަމުގެ ޤާނޫނާއި ޚިލާފަށް، ޑިޕްލޮމެޓިކް މިޝަންތަކުގެ ކައިރިއަށް ތަކުރާރުކޮށް އެއްވެ، އަޑު ގަދަކުރާ ބޭނުންކޮށްގެން ހަޅޭއްލެވުމާއި، ބޭއަދަބީ ބަހުރުވައިން މުޢާމަލާތްކޮށް، އަދި ޑިޕްލޮމެޓިކް މިޝަންތަކުގެ މަސައްކަތަށް ހުރަސް އެޅޭ ގޮތަށް ޢަމަލުކުރުމުގެ އިތުރުން، ވަކި ސަފީރަކަށް އުނދަގޫ ކުރުމުގެ ޢަމަލުތަކެއް ހިންގަމުން ގެންދިއުމާއި ގުޅިގެންނާއި، ފުލުހުންގެ އަމުރަށް ނުކިޔަމަންތެރިވެ ފުލުހުން ދައުރު އަދާކުރުމަށް ހުރަސް އެޅުމާއި ގުޅިގެން ކަމުގައި ފުލުހުން ވަނީ ވިދާޅުވެފައެވެ.