މިދިޔަ ބުރާސްފަތި ދުވަހު މާލޭގައި ހިނގާދިޔަ މީހަކު ރަހީނު ކުރުމުގެ ހާދިސާގައި، ރަހީނުކޮށްފައި ހުރި އަންހެން މީހާ ސަލާމަތްކުރަން އުޅުމުގެ ތެރޭގައި ފުލުހަކަށްވެސް އަނިޔާވެފައިވާ ކަމުގައި، ކޮމިޝަނަރ އޮފް ޕޮލިސް ޢަލީ ޝުޖާއު ވިދާޅުވެއްޖެއެވެ.

ސީޕީ މިހެން ވިދާޅުވީ، ދިވެހި ފުލުހުންގެ މުއައްސަސާ ވަކި މުއައްސަސާއެއްގެ ގޮތުގައި އުފެދި ހިދުމަތްދޭން ފެށިތާ 20 އަހަރު ފުރުން ފާހަގަކުރުމުގެ ގޮތުން މިއަދު ހެނދުނު އިސްކަންދަރު ކޮށީގައި ބޭއްވި ރަސްމީ ޖަލްސާގައި ވާހަކަފުޅު ދައްކަވަމުންނެވެ.

ކޮމިޝަނަރ އޮފް ޕޮލިސް ޢަލީ ޝުޖާއު، ފުލުހުންނަކީ، އެމީހުންގެ ޒިންމާތައް އަދާކުރުމުގައި ރިސްކު އޮތް ބައެއް ކަމަށާއި މިދިޔަ ބުރާސްފަތި ދުވަހު މާލޭގައި ހިނގާދިޔަ ހާދިސާގައި، ކުށުގެ ވެށިން އަނިޔާ ލިބުނުމީހާ ސަލާމަތްކުރަން އުޅުމުގެ ތެރޭގައި ފުލުހަކަށް ލިބުނު އަނިޔާ އެއީ ރައްޔިތުންނަށް ރައްކާތެރިކަން ފޯރުކޮށްދިނުމަށް ފުލުހުން ކުރާ ހިތްވަރު ފެނިގެންދާ ކަމެއް ކަމަށެވެ. އަދި ފުލުހުންގެ ބުރަބޮޑު އެ މަސައްކަތްތަކަށް އެތައް ބައެއްގެ ތައުރީފާއި ފާޑުކިޔުންތައް އަމާޒުކުރަމުންދާއިރު އެ ހުރިހާ ތައުރީފުތަކާއި ފާޑުކިޔުންތައް ހުރިހާ ފުލުހުން ވެސް ގަބޫލުކުރައްވާކަމަށް ސީޕީ ވިދާޅުވިއެވެ.

ބުރާސްފަތި ދުވަހުގެ ރޭ ހިނގި ހާދިސާގައި، ރަހީނުކުރި އަންހެން މީހާ ސަލާމަތް ކުރުމަށް، އެއަންހެން މީހާ ރަހީނުކޮށް ހިފަހައްޓައިގެން ހުރި، ށ. މިލަންދޫ ހެޕީލޭންޑް، އާދަމް އަޠުހަރު (32އ)ގެ ބޮލުގައި ފުލުސް އޮފިސަރަކު ވަނީ މުގުރަކުން ޖަހައި އޭނާ ބިންމައްޗަށް ވައްޓާލާފައެވެ. އަދި އޭނާ ބިންމައްޗަށް ވެއްޓެމުން ދިޔަ ވަގުތު، އޭނާގެ އަތުގައި އޮތް ތޫނު ހަތިޔާރުން އަންހެންމީހާއަށް ހަމަލާދޭން އުޅުމުން އެކަމަށް ހުރަސްއަޅައި ހިފެހެއްޓީވެސް ފުލުސް އޮފިސަރެވެ.

އެރޭގެ ހާދިސާގައި އަންހެން މީހާ ރަހީނުކޮށްގެން އުޅުނު އަޠުހަރަށްވެސް އަނިޔާތަކެއް ލިބުނެވެ. އެއާއެކު އާއްމު ބައެއް ފަރާތްތަކާއި އޭނާގެ އާއިލާ އަދި ސިޔާސީ ބައެއް މީހުންގެ ފާޑުކިޔުންތައް ފުލުހުންނަށް އަމާޒުވެގެން ދިޔައެވެ.