މީހަކު ނުވަތަ ބަޔަކު ޝަޚްޞުއޮޅުވާލައިގެން، ސްޓެލްކޯގެ ނަމުގައި އެކި މީހުންނަށް ގުޅައިގެން މީހުންގެ ޒާތީ މައުލޫމާތުތައް ހޯދުމަށް މަސައްކަތް ކުރަމުންދާތީ އެކަމަށް ސަމާލުވުމަށް ސްޓެލްކޯއިން އިލްތިމާސްކޮށްފިއެވެ.

ސްޓެލްކޯގެ މެނޭޖިންގ ޑައިރެކްޓަރ ޙުސައިން ފަޙްމީ ވިދާޅުވީ، އެފަދަ ސްކޭމެއް ހިންގަމުންދާކަން އެނގިފައި ވަނީ، ސްޓެލްކޯގެ ކަސްޓަމަރުންގެ ފަރާތުން ކަމަށެވެ. އަދި ސްކޭމް ހިންގަމުންދާ ފަރާތުން އަންނަނީ، ސްޓެލްކޯގެ ނަމުގައި ކަސްޓަމަރުންނަށް ދޮގު މައުލޫމާތުދީ އޮޅުވައިލާން މަސައްކަތް ކުރަމުން ކަމުގައިވެސް ފަޙްމީ ވިދާޅުވިއެވެ.

ފަޙްމީ ވިދާޅުވީ، ސްޓެލްކޯއިން އެކުންފުނީގެ އެއްވެސް ކަސްޓަމަރެއްގެ މާލީ މުއާމަލާތްތަކާއި، ޒާތީ މައުލޫމާތު ހޯދަން ފޯނުން ގުޅައިގެން ސުވާލުތައް ނުކުރާނެ ކަމަށެވެ. 

އެކި މުއައްސަސާތަކުގެ ނަމުގައި މީހުންނަށް ފޯނުން ގުޅައިގެން ސްކޭމްތައް ހިންގައި، މީހުންގެ އަތުން ފައިސާ ހޯދުމަކީ، އާއްމުވެފައިވާ ކަމެކެވެ.