ޗެމްޕިއަންސް ލީގުގެ ތާރީހުގައި އެންމެ ގިނަ ގޯލު ޖަހާފައިވާ ކުޅުންތެރިޔާ، ޕޯޗުގަލްގެ ކްރިސްޓިއާނޯ ރޮނާލްޑޯއަށް ޔޫއެފާއިން ހާއްސަ އެވޯޑެއް ދީފިއެވެ. މި އެވޯޑު އޭނާއަށް ދީފައި ވަނީ، ޗެމްޕިއަންސް ލީގުގެ ފުރަތަމަ ސްޓޭޖުގެ މެޗުތަކުގެ ގުރުއަތު ނެގުމަށް ހާއްސަކޮށް މޮނާކޯގައި ބޭއްވި ރަސްމިއްޔާތުގައި ޔޫއެފާގެ ރައީސް، އެލެކްސެންޑަރ ކެފެރިންއެވެ.

ސައުދީ އަރިބިއްޔާގެ އަލް-ނަސްރަށް މިހާރު ކުޅެމުން އަންނަ ރޮނާލްޑޯ ވަނީ އޭނާގެ ކެރިއަރުގައި ކުޅުނު ޗެމްޕިއަންސް ލީގުގެ 183 މެޗުން 140 ގޯލު ކާމިޔާބު ކޮށްފައެވެ. އެއީ އޭނާ ސްޕޯޓިން ލިޒްބަން އިން ޗެމްޕިއަންސް ލީގު ކުޅެން ފެށިތާ 18 އަހަރު ތެރޭގައި ހޯދުނު ކާމިޔާބީއެކެވެ. ރޮނާލްޑޯ އެންމެ ފުރަތަމަ ޗެމްޕިއަންސް ލީގު ކާމިޔާބު ކޮށްފައިވަނީ މެންޗެސްޓަރ ޔުނައިޓެޑާއެކު، 2008 ވަނަ އަހަރުއެވެ.

ރޮނާލްޑޯއަކީ ޗެމްޕިއަންސް ލީގުގެ އިތުރު ރެކޯޑުތަކެއް ވެސް އޮންނަ ކުޅުންތެރިއެކެވެ. އެގޮތުން ތަފާތު ތިން ފައިނަލެއްގައި ގޯލު ޖަހައި، މިހާތަނަށް އެންމެ ގިނަ ފައިނަލްގައި ގޯލު ޖެހުމުގެ ރެކޯޑު ވެސް އޮންނަނީ އޭނާގެ އަތުގައެވެ. އޭނާ ވަނީ 2008، 2014 އަދި 2017 ވަނަ އަހަރުގެ ފައިނަލް މެޗުގައި ގޯލު ޖަހާފައެވެ.

މީގެ އިތުރުން، އެއް ސީޒަނެއްގައި އެންމެ ގިނަ ގޯލު ޖެހުމުގެ ރެކޯޑު ވެސް އޮންނަނީ ރޮނާލްޑޯގެ އަތުގައެވެ. އެގޮތުން 2013/14 ސީޒަނުގައި 17 ގޯލު ކާމިޔާބު ކޮށްފައިވުމުގެ އިތުރުން، މި މުބާރާތުގައި އޭނާ 8 ހެޓްރިކް ވެސް ހަދާފައި ވެއެވެ.

ޗެމްޕިއަންސް ލީގުގެ 7 ސީޒަންގައި އެންމެ ގިނަ ގޯލު ޖެހި ކުޅުންތެރިޔާގެ ޝަރަފު ހޯދާފައިވާ ރޮނާލްޑޯގެ އަތުގައި ދެން އޮންނަ އަނެއް ރެކޯޑަކީ، މެދުނުކެނޑި އެންމެ ގިނައިން ގޯލު ޖެހި ކުޅުންތެރިޔާގެ ރެކޯޑެވެ. އޭނާ ވަނީ މެދުނުކެނޑި 11 މެޗުގައި ގޯލު ޖަހާފައެވެ. އެއީ ޖޫން 2017 އިން އެޕްރީލް 2018 އަށެވެ.