ޤަވާއިދާއި ޚިލާފަށް އުޅޭ ބިދޭސީން ހޯދައި އެމީހުންނާއި މެދު ފިޔަވަޅު އެޅުމަށް އިއްޔެ މޯލްޑިވްސް އިމިގްރޭޝަނުން ހިންގި އޮޕަރޭޝަނުގައި، އެމީހުން ރާއްޖެއަށް ގެނައި ފަރާތްތަކަށް ފިލުމުން، ގެއްލިފައިވާ ކަމަށ އިމިގްރޭޝަނަށް ރިޕޯޓްކޮށްފައިވާ 10 މީހަކު ހޯދުނު ކަމުގައި މޯލްޑިވްސް އިމިގްރޭޝަނުން ވިދާޅުވެއްޖެއެވެ.

މީގެ އިތުރުން އިމިގްރޭޝަނުން ވިދާޅުވީ، އިއްޔެ ހަވީރު 16:00 އިން 18:00 އަށް މާލޭގައި ހިންގުނު ހާއްސަ ހަރަކާތުގައި ވިސާ ފުރިހަމަ ނޫން 273 ބިދޭސީންނަށްވެސް ވަނީ ނޯޓިސްދެވުނު ކަމަށެވެ. އަދި ގަވާއިދާ ހިލާފަށް އެމީހުން ލައްވާ މަސައްކަތްކުރުވާ 120 ދިވެހިންނަށް ވަނީ ލިޔުމުން ނަސޭހަތް ދެވިފައި ކަމުގައިވެސް އިމިގްރޭޝަނުން ވިދާޅުވިއެވެ.

މީގެ އިތުރުން، މި ހަރަކާތުގައި މާލޭގެ އެކި ސަރަހައްދުތަކުން ޖުމްލަ 582 ތަނެއް ބަލައި ފާސްކޮށް، 1,025 ބިދޭސީންނާ ވަނީ ސުވާލުކޮށްފައި ކަމަށްވެސް އިމިގްރޭޝަނުން ވިދާޅުވިއެވެ.

މޯލްޑިވްސް އިމިގްރޭޝަނުން ހާމަކުރައްވާފައިވާ ގޮތުގައި، އިއްޔެ ކުރިއަށް ގެންދެވުނު ހަރަކާތަކީ އިމިގްރޭޝަންގެ 74 އަހަރުވީ ދިގު ތާރީހުގައި، މިހާތަނަށް އެންމެ ގިނަ އަދަދެއްގެ އޮފިސަރުން ބައިވެރިވެ ގަވާއިދާ ހިލާފަށް އުޅޭ ބިދޭސީން ބަލައި ފާސްކުރުމަށް ހިންގުނު އެންމެ ބޮޑު ހަރަކާތެވެ. މިހަރަކާތުގައި،  އިމިގްރޭޝަނުގެ 211 އޮފިސަރުން ބައިވެރިވިއެވެ.