ލޭނު މަސްވެރިކަމުން ސަރުކާރަށް ލިބެން އޮތް ނަފާއަށްވުރެ ރައީސް އިސްކުރެއްވީ، މަސްވެރިންގެ ކަންބޮޑުވުންތައް ކަމުގައި، ފިޝަރީޒް މިނިސްޓަރ އަޙްމަދު ޝިޔާމް ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، ލޭނުގެ މަސްވެރިކަމަށް ހުއްދަ ދިނުމަށް ނިންމި ނިންމެވުން ރައީސުލްޖުމްހޫރިއްޔާ ބަދަލު ކުރައްވައި އެކަން ޢިއުލާނުކުރެއްވުމާއި ގުޅިގެން އެކްސްގައި ކުރެއްވި ޕޯސްޓެއްގައެވެ.

މިނިސްޓަރ އޮފް ފިޝަރީޒް އެންޑް އޯޝަން ރިސޯސަސް އަޙްމަދު ޝިޔާމް ވިދާޅުވީ، މިއަދު ރައީސުލްޖުމްހޫރިއްޔާ ނިންމެވި އެ ނިންމެވުމުގައި އިސްކުރެއްވީ، ލޭނު މަސްވެރިކަމުން ސަރުކާރަށް ލިބެން އޮތް ނަފާއަށްވުރެ ބޮޑަށް، މި ސިނާޢަތުގައި ޙަރަކާތްތެރިވާ ބައެއް ފަރާތްތަކަށް ހުރި ދަތިތަކާއި ކަންބޮޑުވުންތައް ކަމަށެވެ. 

ރާއްޖޭގައި ލޭނު އަޅައިގެން މަސްވެރިކަން ކުރުމަށް ހުޅުވައިލުމަށް ސަރުކާރުން ނިންމާފައިވާކަން އިޢުލާނު ކުރީ މިއަހަރުގެ ޖޫން މަހު 13 ވަނަ ދުވަހު ބޭއްވި ވަޒީރުންގެ މަޖިލީހުގައި މަޝްވަރާކުރެއްވުމަށްފަހު ގައެވެ. ލޭނުގެ މަސްވެރިކަމަށް ހުޅުވާލުމަށް ސަރުކާރުން ނިންމިކަން ޢިއުލާނު ކުރުމާއިއެކު، މަސްވެރިކަމުގެ ސިނާޢަތުގައި ހަރަކާތްތެރިވާ ފަރާތްތަކުންނާއި، ޚާއްޞަކޮށް ބޮޑުކަންނެލީގެ މަސްވެރިކަން ކުރާ ފަރާތްތަކުން އަދި ތިމާވެށި ހިމާޔަތް ކުރުމަށް މަސައްކަތް ކުރާ ފަރާތްތަކުން ވަނީ އެކަމާއި ދެކޮޅަށް ނުކުމެފަައެވެ. 

ލޭނުގެ މަސްވެރިކަމަށް ހުއްދަ ދިނުމަށް ނިންމި ނިންމުން އަނބުރާ ގެނެސް ސަރުކާރުން ބުނެފައި ވަނީ، ސަރުކާރުން އަބަދުވެސް މަސައްކަތްކުރަމުންދާނީ، ރައްޔިތުންގެ ޚިޔާލާއި މަޝްވަރާ އަޑުއަހައިގެން، ރައްޔިތުންގެ އެކި ކަންބޮޑުވުންތަކަށް ރަނގަޅު ޙައްލު ހޯދައިދެވޭނެގޮތަށް، ސަރުކާރުގެ ސިޔާސަތުތައް އެކަށައަޅައި، ހެޔޮ ބަދަލުތައް ޤައުމަށް ގެނަސްދިނުމަށެވެ.