ރާއްޖެއަށް ދިމާވެފައިވާ އިޤުތިޞާދީ ނާޒުކު ހާލަތުން އަރައި ގަތުމަށްޓަކައި، ރިޒާވް ބޭންކް އޮފް އިންޑިއާ އާއެކު 400 މިލިއަން ޑޮލަރުގެ ފޮރިން ކަރަންސީ ސްވޮޕްއެއް ހެދުމަށް މަސައްކަތް ކުރަމުންދާ ކަމުގައި މަރުކަޒީ ބޭންކު އެމްއެމްއޭ އިން ވިދާޅުވެއްޖެއެވެ.

އެމްއެމްއޭއިން މިކަން ހާމަކުރެއްވީ، ފިޗުން ރާއްޖޭގެ ރޭޓިންގ ދަށްކުރުމާއި ގުޅިގެން، އެއޮތޯރިޓީއަށް ފާހަގަކުރެވުނު ކަންކަމުގެ މައްޗަށް އަލި އަޅުވާލާފައި ނެރެފައިވާ ނޫސްބަޔާނުގައެވެ. އެބަޔާނުގައި ވަނީ، ރާއްޖޭގެ ރިޒާވް ރަނގަޅު ކުރުމަށް ކުރަމުން އަންނަ މަސައްކަތްތައް ފާހަގަކޮށްފައެވެ. މިގޮތުން އެމްއެމްއޭގެ ބަޔާނުގައި ވިދާޅުވެފައި ވަނީ، ރާއްޖޭގެ ރަސްމީ ރިޒާވަށް ބަލާއިރު، މިއަހަރުގެ ޖުލައި މަސް ނިމުނު އިރު ރިޒާވުގައި ހުރީ ބޭނުން ކުރެވޭ 45 މިލިއަން ޑޮލަރުކަމަށެވެ. އަދި ހުސްވި 2023 ވަނަ އަހަރުގެ ޖުލައި މަސް ނިމުނު އިރު، ބޭނުންކުރެވޭ ރިޒާވްގައި ހުރީ 129 މިލިއަން ޑޮލަރެވެ.

ރާއްޖޭގެ ބޭނުން ކުރެވޭ ރިޒާވް، މިއޮގަސްޓްމަހުގެ ތެރޭގައި މުޅިން ހުސްވެފައިވާ ކަމުގައި ބައެއް ފަރާތްތަކުން ޚަބަރުފެތުރި ނަމަވެސް އެކަން އެމްއެމްއޭއިން ވަނީ ދޮގުކޮށްފައެވެ. އެމްއެމްއޭގެ ބަޔާނުގައި ބުނެފައިވަނީ، ރިޒާވަށް އިތުރު ފައިސާ ހޯދުމަށް އިންޑިއާގެ ރިޒާވް ބޭންކާއި އެކު 400 މިލިއަން ޑޮލަރުގެ ފޮރިން ކަރަންސީ ސްވޮޕެއް ޤާއިމްކުރުމުގެ މަސައްކަތުގައި މިހާރު އޮތީ އެއްބަސްވުމުގައި ސޮއިކުރުމުގެ މަރުހަލާގައި ކަމަށެވެ. އަދި މީގެ އިތުރުން، ރީފައިނޭންސް ގްރީން ބޮންޑެއް ވިއްކުމަށްވެސް، ސަރުކާރާއި އެ އޮތޯރިޓީ ގުޅިގެން މަސައްކަތް ކުރަމުންދާ ކަމުގައިވެސް އެމްއެމްއޭއިން ވަނީ ވިދާޅުވެފައެވެ.

އެމްއެމްއޭއިން ވިދާޅުވީ، މީގެ ސަރުކާރުގެ މެދުރާސްތާގެ ފިސްކަލް އަދި ޑެޓް ސްޓްރެޓެޖީ އާ އެއްގޮތްވާގޮތުގެ މަތިން ޚަރަދު ކުޑަކުރުމަށާއި އާމްދަނީ އިތުރުކުރުމަށް އަޅާ ފިޔަވަޅުތަކުގެ ސަބަބުން ރާއްޖޭގެ މާލީ ހާލަތު މިހާރަށްވުރެ ރަނގަޅުވާނެ ކަމަށް އަންދާޒާކުރެވޭ ކަމަށެވެ. އަދި މާލީ ނިޒާމަށް ގޮންޖެހުންތައް ކުރިމަތިވި ނަމަވެސް އެމްއެމްއޭ އާއި ފިނޭންސް މިނިސްޓްރީ އާއި ސަރުކާރުގެ ކަމާގުޅުންހުރި ވުޒާރާތަކާއި މާލީ ހުރިހާ އިދާރާތައް އެކުވެގެން ކުރާ މަސައްކަތުން އެދެވޭ ނަތީޖާއަކަށް ވާސިލްވެވޭނެ ކަމުގެ ފުރިހަމަ ޔަޤީންކަން އެބައޮތް ކަމުގައިވެސް އެމްއެމްއޭއިން ވަނީ ވިދާޅުވެފައެވެ.