ސީޝެލްސް އެއަރޕޯޓް ތަރައްޤީ ކުރުމަށް ކުރަމުންދާ މަސައްކަތުގައި ތަޖުރިބާ އާއި ލަފާ ހޯދުމަށް އެ ގައުމުގެ ދަތުރުފަތުރާ ބެހޭ ވުޒާރާގެ ވަފުދެއް ވެލާނާ އިންޓަނޭޝަނަލް އެއަރޕޯޓަށް ޒިޔާރަތްކޮށްފިއެވެ.

މި ޒިޔާރަތުގައި ސީޝެލްސްގެ މިނިސްޓަރ އޮފް ޓްރާންސްޕޯޓް އެންޓަނީ ޑެޖާކް އަދި އެ މިނިސްޓްރީގެ އިސް ބޭފުޅުންނާއި ސީޝެލްސް ސިވިލް އޭވިއޭޝަން އޮތޯރިޓީގެ އިސް ބޭފުޅުންނާއި އެމް.އޭ.ސީ.އެލްގެ މެނޭޖްމަންޓުންވަނީ ބައްދަލުކުރައްވާފައެވެ. މިބައްދަލުވުމުގައި ދިވެހިރާއްޖޭގެ ދަތުރުފަތުރާއި މަދަނީ އުދުހުންތަކާ ބެހޭ ވުޒާރާގެ ޑެޕިއުޓީ މިނިސްޓަރ މުޙައްމަދު އަފްލާހް އާއި  ސީނިއަރ ޕޮލިޓިކަލް ޑިރެކްޓަރ މުއާޒް ރަޝީދު އަދި ދިވެހިރާއްޖެއިން ސީޝެލްސްއަށް ކަނޑައަޅުއްވާފައި ހުންނަވާ އޮނޮރަރީ ކޮންސުލް މުހައްމަދު ފިރާޤް ބައިވެރިވެވަޑައިގަތެވެ.

މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމް.އޭ.ސީ.އެލް.) އިން މައުލޫމާތު ދީފައިވާ ގޮތުގައި ސީޝެލްގެ ޓީމުގެ އެންމެ ބޮޑު ބޭނުމަކީ ވެލާނާ އިންޓަރނޭޝަނަލް އެއަރޕޯޓު ފަދަ މެގަޕްރޮޖެކްޓެއް ނިންމުމުގައި ރާއްޖެއިން ތަޖުރިބާކުރި ގޮންޖެހުންތައް ދެނެގަނެ، ސީޝެލްސްއިން އެއަރޕޯޓް ތަރައްޤީ ކުރުމުގައި އެ ތަޖުރިބާގެ ބޭނުން ހިފުމެވެ. އެހެންކަމުން ސީޝެލްގެ އެއަރޕޯޓް ތަރައްޤީ ކުރުމުގައި އެބޭފުޅުންނަށް ހުރި ގޮންޖެހުންތަކާއި، ގެންގުޅުއްވާ ވިސްނުން ޙިއްސާކޮށް އެކަމުގައި އެމް.އޭ.ސީ.އެލްގެ ތަޖުރިބާކާރު ޓީމްތަކުގެ ލަފާވަނީ ހޯދާފައެވެ. މީގެ އިތުރުން ރާއްޖެފަދަ ޖަޒީރާ ޤައުމަކުން މިހާ ފުރިހަމަ އެއަރޕޯޓެއް ތަރައްޤީ ކުރުމުގައި ގެންގުޅޭ ވިސްނުންތަކާމެދު ޚިޔާލު ބަދަލުކޮށްފައިވެއެވެ.

އެމްއޭސީއެލްއާ ސީޝެލްގެ ޓީމާ އޮތް ބައްދަލުވުމަށްފަހު ސީޝެލްސްގެ ވަފުދުން ވަނީ ވެލާނާ އިންޓަރނޭޝަނަލް އެއަރޕޯޓްގައި ނިމިފައި ހުރި ފެސިލިޓީތަކަށް ޒިޔާރަތްކޮށް އެތަންތަނުގެ ބޭނުން ހިފަމުންދާ ގޮތް ބަލާފައެވެ. އަދި ތަރައްޤީ ކުރަމުން އަންނަ އައު ޓާރމިނަލާއި އެއާއިގުޅޭ އެހެނިހެން މަސައްކަތްތައްވެސް ބަލާފައި ވެއެވެ.