ސްޓެލްކޯއިން ރައްޔިތުންނަށް ދޭ ހިދުމަތް އިތުރަށް ފުރިހަމަ ކުރުމުގެ ގޮތުން، އެ ކުންފުނީގައި ކޯލް ސެންޓަރެއް ގާއިމްކޮށް، ފަސޭހައިން ގުޅޭނެ އިންތިޒާމު ހަމަޖެއްސުމުގެ ގޮތުން 1545 ހޮޓްލައިން ތައާރަފްކޮށްފިއެވެ.

ސްޓެލްކޯއިން ހާމަކޮށްފައިވާ ގޮތުގައި، މި ހޮޓްލައިން މެދުވެރިކޮށް ސްޓެލްކޯއިން ފޯރުކޮށްދެމުންދާ ހުރިހާ ޚިދުމަތަކާއި ގުޅުންހުރި މަޢުލޫމާތާއި، ކަރަންޓު ބިލްތަކާއި ގުޅުންހުރި ޝަކުވާތަކާއި، ކުންފުންޏާއި ގުޅުންހުރި އެނޫންވެސް ކަންކަމުގައި އެ ކުންފުންޏާއި މުއާމަލާތް ކުރެވޭނެއެވެ.

ފުޅާ ދާއިރާއެއްގައި ރައްޔިތުންނަށް ހިދުމަތްދެމުން އަންނަ ސްޓެލްކޯގައި ކޯލް ސެންޓަރެއް ގާއިމްކޮށް ހޮޓްލައިނެއް ތައާރަފް ކުރެވުން އެ ކުންފުނީގެ މެނޭޖިން ޑިރެކްޓަރ، ހުސެއިން ފަހުމީ ފާހަގަ ކުރައްވަނީ ވަރަށް ތާރީހީ ކަމެއްގެ ގޮތުގައެވެ. އެގޮތުން ފަހުމީ ވިދާޅުވީ، އެބޭފުޅާގެ އަމާޒަކީ ސްޓެލްކޯއަކީ ހުރިހާ ގޮތަކުންވެސް ރައްޔިތުންނާއި ގާތުން މަސައްކަތްކޮށް، ރައްޔިތުންގެ އިތުބާރާއި ޔަޤީންކަން ކަށަވަރުވެފައިވާ ކުންފުންޏެއްގެ ގޮތުގައި ދެމިއޮތުން ކަމަށެވެ.

ހޮޓްލައިން ނަމްބަރު މެދުވެރިކޮށް ގުޅުމުގެ އިތުރުން، ވައިބާ، ވަޓްސްއަޕް އަދި ޓެލެގްރާމް މެދުވެރިކޮށް ވެސް އެ ކުންފުންނާ މިހާރު ޗެޓް ކުރެވޭނެއެވެ. އެގޮތުން ސްޓެލްކޯގެ ވެބްސައިޓަށް ޒިޔާރަތްކޮށް (https://stelco.com.mv/stelcocare) ބޭނުންފުޅުވާ ޕްލެޓްފޯމަކަށް ފޯނުން ސްކޭން ކުރެއްވުމުން، އެ ޕްލެޓްފޯމެއް މެދުވެރިކޮށް ކޮންޓެކްޓް ސެންޓަރާއި މުއާމަލާތް ކުރެވޭނެއެވެ.