ބޭންކް އޮފް މޯލްޑިވްސްއިން އާދީއްތަ ދުވަހު ނިންމި ނިންމުމާއި ގުޅިގެން ހިނގައިދިޔަ ކަންކަމަކީ، ބަޣާވާތެއް ކަމަށް ބަލައި، ކުރިއަށް ގެންދާ ތަހުގީގުގައި، ހޯދަންޖެހޭ އެންމެހައި މަޢުލޫމާތު އެއްކުރުމާއި، ބަލަންޖެހޭ އެންމެހައި ކަންކަން ތަފްސީލުކޮށް ދިރާސާކުރުމުގެ މަސައްކަތް ދަނީ ކުރަމުންކަމުގައި ފުލުހުންގެ އިދާރާއިން ވިދާޅުވެއްޖެއެވެ.

ފުލުހުންގެ އިދާރާއިން ވިދާޅުވީ، އެ ތަޙްޤީޤާއިއެކުގައި، އެމައްސަލަތަކުގައި، ފިޔަވަޅު އަޅަންޖެހޭ ފަރާތެއްވާނަމަ އެކަން ދެނެގަތުމާއެކު، ތަޙްޤީޤު މަރުޙަލާގައި ކުރަންޖެހޭ އެންމެހައި މަސައްކަތްތައް ވެސް ދަނީ ކުރަމުން ކަމަށެވެ. 

ފުލުހުންގެ އިދާރާއިން ހޯމަ ދުވަހުގެރޭ ނެރުނު ބަޔާނުގައި ވިދާޅުވެފައި ވަނީ، ސަރުކާރުގެ މައި ހިއްސާ އޮންނަ ބޭންކަކުން ސަރުކާރުގެ މަޝްވަރާއާއި ޚިލާފަށް ދިވެހި ގިނަ ރައްޔިތުންނަށް ކުއްލި ސިހުމެއް ލިބޭ ގޮތަށް، ނިންމުމެއް ނިންމި ވަގުތާއި ދިމާކޮށް، ސިޔާސީ ފަރާތްތަކަކުން ސަރުކާރުގެ މާލީ ހަލާތާއި ގުޅޭ ގޮތުން ނޫސްވެރިންގެ ބައްދަލުވުން ބާއްވައި، ހަމަ އެވަގުތު ސޯޝަލް މީޑިއާ އެތައް ސަތޭކަ ބޮޓް އެކައުންޓް ބޭނުންކޮށް ސަރުކާރު ވައްޓާލަން މަގުތަކަށް ނުކުތުމަށާއި އާއްމު ހަމަޖެހުން ނަގާލުމަށް ގޮވާލައި، ޤައުމުގެ މަސްލަހަތު ނަގާލުމަށް ހިއްވަރުދީ ހަދާފައި ވާތީ، އެކަމަކީ ޤާނޫނީ ސަރުކާރެއް ޣައިރު ޤާނޫނީ ގޮތުން ބަދަލުކޮށްލުމަށް ރޭވިގެން ދިޔަ ކަމެއްކަމަށް ބެލުމުގެ ޖާގަ އޮތުމުން އެމައްސަލަ ފުލުހުން ތަޙްޤީޤު ކުރަންފަށާފައިވާ ކަމަށެވެ.

އެހެން ނަމަވެސް އެކަމާއި ގުޅިގެން މިހާތަނަށް އެއްވެސް މީހަކު ހައްޔަރުކުރި ކަމެއް، އަދި އެއްވެސް މީހަކާއި ސުވާލުކުރިކަމެއް އަދި އެއްވެސް ތަނެއް ބަަލައި ފާސްކޮށްފައިވާ ކަމެއްވެސް ފުލުހުން ހާމަކުރައްވާފައެއް ނުވެއެވެ.