ރާއްޖޭގައި ޤަވާއިދާއި ޚިލާފަށް އުޅޭ ބިދޭސީންގެ މައްސަލައަށް ހައްލެއް ހޯދުމަށް މިސަރުކާރުން ކުރަމުންގެންދާ މަސައްކަތްތަކުގެ ތެރެއިން މިހާތަނަށް ތިންހާހަށް ވުރެ ގިނަ ބިދޭސީން ރާއްޖެއިން ޑީޕޯޓްކޮށްފައިވާ ކަމުގައި މޯލްޑިވްސް އިމިގްރޭޝަނުން ހާމަކުރައްވައިފިއެވެ.

އިމިގްރޭޝަނުން ހާމަކުރައްވާފައިވާ ގޮތުގައި ފާއިތުވި 9 މަސް ދުވަހުގެ ތެރޭގައި އެކި މަައްސަލަތަކާއި ގުޅިގެން ރާއްޖެއިން ޖުމުލަ 3322 ބިދޭސީއަކު ވަނީ ރާއްޖެއަށް އަނބުރާ ނާދެވޭނެހެން ޑީޕޯޓްކޮށްފައެވެ.

ރާއްޖެއިން ޑީޕޯޓްކުރި މީހުންގެ ތެރޭގައި ހިމެނެނީ، ޞައްޙަ ވިސާއެއް ނެތް މީހުންނާއި، ވިސާ ހޯދި ބޭނުން ފިޔަވައި އެހެން ކަންކަމުގައި އުޅުނު ބިދޭސީންނާއި، ރާއްޖޭގެ ޤާނޫނުތަކާއި ޤަވާއިދުތަކާއި ޚިލާފަށް އުޅެމުން ދިޔަ ބިދޭސީންނެވެ.

އިމިގްރޭޝަނާއި ފުލުހުން އަދި ކަމާއި ގުޅުންހުރި އެހެން މުއައްސަސާތަކާއި އެކު މިހާރުވެސް އިމިގްރޭޝަނުން ދަނީ ރާއްޖޭގައި ޤަވާއިދާ ޚިލާފަށް އުޅޭ ބިދޭސީންނާއި، ރާއްޖޭގައި ޤަވާއިދާއި ޚިލާފަށް ވިޔަފާރިކުރާ ބިދޭސީން ހޯދައި އެމީހުންނާއި މެދު ފިޔަވަޅު އަޅައި ރާއްޖެއިން ފޮނުވާލަމުންނެވެ.

ބޮޑުވެފައިވާ ބިދޭސީންގެ މައްސަލައަށް  ޙައްލެއް ހޯއްދަަަވައި ދެއްވުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދެކެވެ. އަދި މިވެރިކަމުގެ ފުރަތަމަ 3 އަހަރުގެ ތެރޭގައި އެމައްސަލަ ޙައްލު ކުރައްވާނެ ކަމުގައި މިހާރުގެ ހޯމް މިނިސްޓަރުވެސް ވަނީ ވިދާޅުވެފައެވެ.