ބޭންކް އޮފް މޯލްޑިވްސްގެ ޑިރެކްޓަރުންގެ ބޯޑަށް މެންބަރުން ހޮވުމަށް، ޚާއްޞަ ގޮތުން ބާއްވާ އާއްމު ޖަލްސާއެއް ސެޕްޓެމްބަރުމަހުގެ 21 ވަނަ ދުވަހު ބޭއްވުމަށް ނިންމާފައިވާ ކަމުގައި އެ ބޭންކުން ހާމަކޮށްފިއެވެ.

ބީއެމްއެލްއިން ހާމަކޮށްފައިވާ ގޮތުގައި އެޖަލްސާއަކީ، ފިނޭންސް މިނިސްޓްރީގެ އެދުމުގެ މަތިންް، އެކުންފުނީގެ ޑިރެކްޓަރުންގެ ބޯޑުން ހުސްވެފައިވާ ޑިރެކްޓަރުންގެ ބަދަލުގައި އައު ބޭފުޅުން ހޮވުމަށް ބޭއްވުމަށް ހަމަޖައްސާފައިވާ ޖަލްސާއެކެވެ. އެޖަލްސާގައި އޮންނާނީވެސް ޑިރެކްޓަރުންގެ ބޯޑުން ހުސްވެފައިވާ މެމްބަރުންގެ މަޤާމުތަކަށް އައު މެމްބަރުން ޢައްޔަނުކުރުން ކަމުަގައިވެސް ބީއެމްއެލްއިން ވަނީ ބުނެފައެވެ.

ބޭންކުގެ ބޯޑުގައި ޖުމުލަ 11 މެމްބަރުން ތިއްބަވަން ޖެހޭއިރު މިހާރު އެބޯޑުގައި ތިއްބެވީ ޖުމުލަ 7 މެމްބަރުންނެވެ.

އާދީއްތަ ދުވަހު، ބީއެމްއެލްއިން އެބޭންކުގެ ރުފިޔާ އެކައުންޓްތަކަށް ދޫކޮށްފައިވާ ކާޑުތަކުން ޑޮލަރުގެ މުއާމަލާތް ނުކުރެވޭ ގޮތަށް ނިންމުމާއި، ގޯލްޑް އަދި ކްރެޑިޓްކާޑުތަކުގެ ލިމިޓް 100 ޑޮލަރަށް ދައްކުރުމަކީ، ބަޣާވާތެއް ގެންނަން އުޅުން ކަމުގައި ސަރުކާރުން ވަނީ ސިފަކޮށްފައެވެ.

އަދި މިސަރުކާރުގެ އިސްވެރިންވަނީ، ބޭންކް އޮފް މޯލްޑިވްސްގެ ޑިރެކްޓަރުންގެ ބޯޑުގެ މެމްބަރުންނާއި ބޭންކުގެ ސީއީއޯވެސް އިސްތިއުފާ ދެއްވުމަށް ގޮވާލައްވާފައެވެ.