ޕްރޮސެކިއުޓަރ ޖެނެރަލްގެ މަޤާމަށް ކުރިމަތިލާން ބޭނުންވާ ފަރާތްތަކަށް ރައީސުލްޖުމްހޫރިއްޔާގެ އޮފީހުން މިއަދު ފުރުޞަތު ހުޅުވާލައިފިއެވެ.

ރައީސުލްޖުމްހޫރިއްޔާގެ އޮފީހުން ވިދާޅުވީ، ޕްރޮސެކިއުޓަރ ޖެނެރަލްގެ މަޤާމަށް އެދި ހުށަހެޅުމުގެ ފުރުޞަތު ހުޅުވާލައްވާފައި ވަނީ މިއަދުން ފެށިގެން 11 ސެޕްޓެންބަރު 2024 ވާ ބުދަ ދުވަހުގެ 12:00 ގެ ނިޔަލަށް ކަމަށެވެ.

އަދި މި މަޤާމަށްއެދި ހުށައަޅާ ފޯމު ބަލައިގަތުމަށް ހަމަޖެހިފައިވަނީ، 10 ސެޕްޓެންބަރު 2024 ވާ އަންގާރަ ދުވަހާއި 11 ސެޕްޓެންބަރު 2024 ވާ ބުދަ ދުވަހުގެ ހެނދުނު 08:30 އިން 12:00 އަށް ރައީސުލްޖުމްހޫރިއްޔާގެ އޮފީހުން ކަމަށާއި، އެ މަޤާމަށް އެދި ހުށައަޅާ ފޯމު ރައީސުލްޖުމްހޫރިއްޔާގެ އޮފީހުގެ ވެބްސައިޓް https://www.presidency.gov.mv އިން ޑައުންލޯޑް ކުރެއްވޭނެ ކަމުގައިވެސް އެ އޮފީހުން ވިދާޅުވެފައިވެއެވެ.

ޕްރޮސެކިއުޓަރ ޖެނެރަލްގެ މަޤާމު ހުސްވީ، ސަރުކާރުން އެމަޤާމުގައި ހުންނެވި، ޙުސައިން ޝަމީމް މަޖިލިސް މެދުވެރިކޮށް މަޤާމުން ވަކިކުރައްވަން އުޅުމުން އެމަނިކުފާނު މަޤާމުން އިސްތިއުފާ ދެއްވުމުންނެވެ. ޕީޖީ ޙުސައިން ޝަމީމް މަޤާމުން އިސްތިއުފާ ދެއްވިކަމުގެ ސިޓީ ރައީސުލްޖުމްހޫރިއްޔާ އޮފީހަށް ލިބުނުކަން އެނގިފައި ނުވާކަަމަށް ބުނެ، ޕީޖީ އިސްތިއުފާ ދެއްވިކަން އާއްމުކޮށް އިޢުލާނުކުރައްވާފައި ވަނިކޮށް، މަޖިލީހުން ވަނީ، ޕީޖީ ހުސައިން ޝަމީމް މަޤާމުން ވަކިކުރަން މަޖިލީހުގައި ވޯޓުނަގައި ފާސްކޮށްފައެވެ.