ދިވެހިރާއްޖޭގެ ޤައުމީ ބޭންކު، ބޭންކް އޮފް މޯލްޑިވްސްގައި ޚިދުމަތް ކުރައްވަމުން ގެންދަވާތާ 42 އަހަރުވެފައިވާ، އައިޝަތު ނޫރައްދީން، އެކުންފުނީގެ ބޯޑު މެމްބަރު ކަމުގެ މަޤާމުން އިސްތިއުފާ ދެއްވައިފިއެވެ.

ބީއެމްއެލްއިން މިއަދު އާއްމު ކުރި ކުރު ބަޔާނެއްގައި ވިދާޅުވީ، އައިޝަތު ނޫރައްދީން ބޭންކުގެ ބޯޑުން އިސްތިއުފާ ދެއްވާފައި ވަނީ، މިދިޔަ އާދީއްތަ ދުވަހުގައި ކަމަށެވެ. އޭގެ ކުރިން މިދިޔަ ބުރާސްފަތި ދުވަހު، އައިޝަތު ނޫރައްދީން ބީއެމްއެލްގެ ބޯޑުން ވަކިކުރެއްވިކަން އަންގައި ޕީބީސީން އޭނާއަށް ސިޓީއެއްވެސް ފޮނުވިއެވެ. އެހެން ނަމަވެސް އެނިންމުމަކީ ޤާނޫނީ ގޮތުން ޕީބީސީއަށް ނިންމެން އޮތް ނިންމުމެއް ނޫނެވެ.

އައިޝަތު ނޫރައްދީން ބޯޑު އެމްބަރުކަމުގެ މަޤާމުން އިސްތިއުފާ ދެއްވިކަން ހާމަކޮށް ބީއެމްއެލްއިން ނެރުނު ބަޔާނުގައި ވަނީ، އޭނާއަށް ޝުކުރުވެސް އަދާކުރައްވާފައެވެ. އައިޝަތު ނޫރައްދީން ބީއެމްއެލްގެ ބޯޑުން އިސްތިއުފާ ދެއްވި ނަމަވެސް، އޭނާ އަދާކުރައްވަމުން ގެންދަވާ ބީއެމްއެލްގެ ޑެޕިއުޓީ ސީސީއޯގެ މަޤާމުގައި އޭނާ ދެމި ހުންނަވާނެއެވެ.

އައިޝަތު ނޫރައްދީން، ބީއެމްއެލްގެ ވަޒީފާއާ ގުޅިވަޑައިގެންނެވީ 1982 ވަނަ އަހަރުއެވެ. މިއީ އޭނާ ބޭނުންކުގެ ވަޒީފާގައި ހުންނަވާތާ 42 ވަނަ އަހަރެވެ. އައިޝަތު ނޫރައްދީން ބޭންކުގެ އިސް މަޤާމުތަކާއި ބޯޑުގައިވެސް މަސައްކަތް ކުރައްވާފައިވާއިރު، އެންމެ ފަހުން އޭނާ އެބޯޑަށް ޢައްޔަނުކުރައްވާފައި ވަނީ، 31 އޮގަސްޓް 2020ގައެވެ.