ލަގެޖުގައި 80000 ވުރެ ގިނަ ޑޮލަރު ފޮރުވައިގެން، ވަގަށް ރާއްޖެއިން ބޭރަށް ގެންދަން އުޅުނު ބަނގުލަދޭޝް މީހާގެ ބަންދަށް 15 ދުވަސް ޖަހައިފިއެވެ.

މިމައްސަލައިގައި ހައްޔަރުކޮށްފައި ވަނީ، ބަނގުލަދޭޝްގެ ރައްޔިތެއް ކަމުގައިވާ، އުމުރުން 32 އަހަރުގެ ޝަހްމިން އިސްލާމް ޝަގުރްއެވެ. ފުލުހުންގެ އިދާރާއިން ވިދާޅުވީ، އޭނާގެ ބަންދުގެ މުއްދަތު އިތުރުކުރުމަށް ކްރިމިނަލް ކޯޓަށް ހާޟިރު ކުރުމުން 15 ދުވަހަށް އޭނާ ބަންދުގައި ބެހެއްޓުމަށް ކޯޓުން އަމުރު ދީފައިވާ ކަމުގައި ފުލުހުންގެ އިދާރާއިން ވިދާޅުވިއެވެ.

ފުލުހުންގެ އިދާރާއިން ވިދާޅުވީ، އޭނާގެ މައްޗަށް ކުރެވެނީ މަނީ ލޯންޑަރިންގެ ތުހުމަތުކަމަށާއި އެ މައްސަލަ ފުލުހުން ތަޙްޤީޤު ކުރަމުންދާ ކަމަށެެވެ.

އޭވިއޭޝަން ސެކިއުރިޓީ ކޮމާންޑުން ހާމަކޮށްފައިވާ ގޮތުގައި، މިމަހުގެ 25 ވަނަ ދުވަހު، ބަންގްލާ އެއަރލައިންސް (BS338) އިން މާލެއިން ޑާކާއަށް ދަތުރުކުރަން ދިޔަ ބަންގްލަދޭޝް ރައްޔިތެއްގެ ލަގެޖްގައި ފޮރުވައިގެން ޤަވާޢިދާއި ޚިލާފަށް ރާއްޖެއިން ބޭރުކުރަން އުޅުނު 81030 ޑޮލަރު ވަނީ އަތުލައިގެންފައެވެ. އަދި ހަމަ އެދުވަހު އޭނާ ވަނީ ކަމާއި ބެހޭ ފަރާތްތަކަށް ހަވާލުވެސް ކޮށްފައެވެ.