ބޭންކް އޮފް މޯލްޑިވްސްގެ ރުފިޔާ އެކައުންޓްތަކުން ޑޮލަރުގެ މުއާމަލާތް ނުކުރެވޭ ގޮތަށް ބޭންކުން ގެނައި ބަދަލާއި އެއާއި ގުޅިގެން ހިނގައި ދިޔަ ކަންތައްތަކަކީ ބަޣާވާތެއް ގެންނަން އުޅުން ކަމުގައި ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، މިހާރު ޕީއެންސީ އެޕާޓީގެ ހަރުގޭގައި ބާއްވަމުންދާ ޖަލްސާގައި ވާހަކަފުޅު ދައްކަވަމުންނެވެ. އެކަމާއި ގުޅޭ ތަޙްޤީޤުތައް ފުލުހުން ފަށާފައިވާކަން މިރޭ އިޢުލާނުކުރުމަށްފަހު ރައީސް ވިދާޅުވީ، އެކަން ވާނީ ހަމަ އެޓެމްޕެޑް ކޫއަކަށް ކަމަށެވެ. އަދި އެއީ މިސަރުކާރާއި ދެކޮޅަށް ގެންނަ އުޅުނު ދެވަނަ ބަޣާވާތް ކަމުގައިވެސް ރައީސުލްޖުމްހޫރިއްޔާ ވަނީ ވިދާޅުވެފައެވެ.

ރައީސުލްޖުމްހޫރިއްޔާ ވިދާޅުވީ، ފުލުހުންގެ ތަޙްޤީޤަށް ފާހަގަކުރެވޭ މީހުންގެ މައްޗަށް ދައުވާކޮށް، އެމީހުންގެ މައްޗަށް އެކަން ސާބިތުވެއްޖެ ނަމަ، ކޯޓުގެ ނިންމުންތައްވެސް ތަންފީޒް ކުރައްވާނެ ކަމަަށެވެ. އެހެން ނަމަވެސް މިސަރުކާރުން އެއިން އެއްވެސް ކަމެއްގައި ޝަރުޢީ ދާއިރާއަށް އެއްވެސް ނުފޫޒެއް ނުފޯރުވާނެ ކަމުގައި ވިދާޅުވިއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ، ސަރުކާރުން ޝަރީޢަތްތަކަށް ނުފޫޒު ފޯރުވުން 17 ނޮވެމްބަރުގައި ނިމިގެން ހިނގައްޖެ ކަމަށެވެ. އަދި ކުރީގެ ރައީސް ޔާމީނު މިނިވަން ވުމުންވެސް އެކަން ސާބިތުވާނެ ކަމުގައި ރައީސް ޑރ. މުޢިއްޒު ވިދާޅުވިއެވެ.

ބީއެމްއެލްއިން އިއްޔެ ރުފިޔާކާޑުތަކުން ޑޮލަރުގެ މުއާމަލާތްތައް ނުކުރެވޭ ގޮތަށް ނިންމުމާއި، އަދި ސްޓޭންޑަރޑް އަދި ގޯލްޑް ކްރެޑިޓް ކާޑުތަކަށް ދޭ ލިމިޓް 100 ޑޮލަރަށް ދަށްކުރުމަށް ނިންމުމާއި އެކު އެކަމާއި އެއާއި ގުޅިގެން ހިނގައި ދިޔަ އެހެން ކަންތައްތަކަކީ، ރޭވިގެން ގެންނަ އުޅުނު ބަޣާވާތެއް ކަމުގައި ރައީސުލްޖުމްހޫރިއްޔާ އާއި ވަޒީރުންނާއި ސަރުކާރަށް ތާޢީދުކުރާ ފަރާތްތަކުން މިހާރު ދަނީ ބުނަމުންނެވެ.