ދިވެހިރާއްޖޭގައި ރައީސުލްޖުމްހޫރިއްޔާކަން ކުރެއްވި ބޭފުޅުންގެ ތެރެއިން މިރާއްޖެއަށް އެންމެ ބޮޑު ޚިޔާނާތެއްވީ ބޭފުޅަކީ، ކުރީގެ ރައީސުލްޖުމްހޫރިއްޔާ ޢަބުދުﷲ ޔާމީން ޢަބްދުލްޤައްޔޫމް ކަމުގައި، ވެރިކަންކުރާ ޕާޓީ ޕީއެންސީގެ ޕާލަމެންޓްރީ ގުރޫޕްގެ ލީޑަރު، އިނގުރައިދޫ ދާއިރާގެ މަޖިލިސް މެމްބަރު އިބްރާހީމް ފަލާޙް ވިދާޅުވެއްޖެއެވެ.

ފަލާޙް މިހެން ވިދާޅުވީ، ޕީއެންސީގެ ހަރުގޭގައި މިހާރު ކުރިޔަށް ގެންދާ ޖަލްސާގައި ވާހަކަފުޅު ދައްކަވަމުންނެވެ. ރައީސް ޔާމީނަށާއި އެމަނިކުފާނުގެ އަނބިކަނބަލުން ފާޠިމަތު އިބްރާހީމަށް ތުހުމަތުތައް ކޮށް، ފަލާޙް ވަނީ، އެދެކަނބަލުންނަށް ވަރަށް ބޮޑަށް ފާޑު ވިދާޅުވެ، މަލާމާތާއި ފުރައްސާރަވެސް ކުރައްވާފައެވެ.

ފަލާޙް ވިދާޅުވީ، ރައީސް ޔާމީން އުޅުއްވަނީ، ޑރ. މުޙައްމަދު މުޢިއްޒު ރައީސުލްޖުމްހޫރިއްޔާ ކަމުގެ މަޤާމުގައި ހުންނެވީތީ އެކަމާއި ހަސަދަވެރިވެވަޑައިގެންކަމަށެވެ. ފަލާޙް ވަނީ، އެމްއެމްޕީއާރްސީގެ ވައްކަމުގައި އޭނާ އާއި އެހެން ބައެއް ބޭފުޅުން ބައިވެރިވިކަމަށް ހިމަނާފައި ވަނީވެސް ރާވައިގެން ކަމުގައި ފަލާޙް ވިދާޅުވިއެވެ.

ފަލާޙް އިތުރަށް ވިދާޅުވީ، އެފައިސާ ދައުލަތަށް ހޯއްދެވުމުގެ މަސައްކަތް ރައީސުލްޖުމްހޫރިއްޔާ ގެންދަވަނީ ކުރައްވަމުން ކަމަށެވެ. އަދި އެފައިސާ ދައުލަތަށް ހޯއްދަވާނެ ކަމުގައިވެސް ފަލާޙް ވިދާޅުވިއެވެ. އަދި އެމްއެމްޕީއާރްސީގެ ފައިސާ ލިބުނު ގިނަވެރިން އެފައިސާ ބަހައްޓާފައި ވަނީ ސިންގަޕޫރުގެ އެކައުންޓްތަކުގައި ކަމަށާއި، އެޑޮލަރު ރާއްޖެ އެތެރެކުރެވުނު ނަމަވެސް ޑޮލަރަށް އޮތް ދަތިކަން ފިލާނެ ކަމުގައިވެސް ފަލާޙް ވިދާޅުވިއެވެ.

ކުރީގެ ރައީސް ޔާމީނަށާއި، އެމަނިކުފާނުގެ އަނބިކަނބަލުންނަށް ފާޑު ވިދާޅުވެ ފަލާހު ދެއްކެވި ވާހަކަފުޅުގައި ވިދާޅުވީ، ރައީސް ޔާމީނުގެ ވެރިކަމުގައި މުލިއާގޭ ވަޅުދިޔަ ހިއްކުމަކީވެސް އެބޭފުޅުން ކުރައްވަން ޖެހިވަޑައިގެންނެވި ކަމެއް ކަމުގައި ވިދާޅުވެފައެވެ. އަދި މުލިއާގެއަށް ވަޑައިގަންނަވަން ރައީސް ޔާމީނު ދައުވަތު ދެއްވުމުން އެގެއަށް ވަޑައިގަންނަވަނީވެސް މަސައްކަތް ކުރަންޖެހޭތީ ބައު ހެދުމުގައިކަމަށްވެސް ފަލާޙް ވިދާޅުވިއެވެ.