ބޭރު ފައިސާއިން އާމްދަނީ ލިބޭ ވިޔަފާރިތަކުން ރާއްޖެއަށް އެތެރެކުރާ މުދަލުން ނަގާ އިމްޕޯޓް ޑިއުޓީ، އެމެރިކާ ޑޮލަރުން ނެގުމަށާއި، ބޭރު ފައިސާއިން ދޭ އުޖޫރައިން، ޕެންޝަން ކޮންޓްރިބިއުޝަން، އެމެރިކާ ޑޮލަރުން ނަގަން ފެށުމާއި ބޭރު ފައިސާއިން އާމްދަނީ ލިބޭ ކުންފުނިތަކުގެ ކޯޕަރޭޓް އިންކަމް ޓެކްސް، އެމެރިކާ ޑޮލަރުން ދައްކާ ގޮތަށް ބަދަލު ކުރުމަށް ރައީސުލްޖުމްހޫރިއްޔާ ނިންމަވައިފިއެވެ.

ރައީސުލްޖުމްހޫރިއްޔާ މިނިންމުން ނިންމެވީ، އިއްޔެ ބޭއްވެވި ވަޒީރުންގެ މަޖިލީހުގައި އެކަމާއި ގުޅޭ ގޮތުން މަޝްވަރާކުރެއްވުމަށް ފަހުގައެވެ.

ރައީސުލްޖުމްހޫރިއްޔާގެ އޮފީހުން ވިދާޅުވީ، އެނިންމެވުމަކީ، ދިވެހިރާއްޖޭގެ ބޭރު ފައިސާގެ ބާޒާރު ހަރުދަނާކޮށް، ދިވެހި ރުފިޔާއަށް އޮންނަ ޑިމާންޑް މިހާރުން މިހާރަށް އިތުރުކުރެއްވުމަށްޓަކައި ނިންމެވި ނިންމެވުމެއް ކަމަށެވެ. އެގޮތުން އެނިންމެވުން ތަންފީޒް ކުރެއްވުމަށްޓަކައި، ޤާނޫނުތަކާއި ގަވާއިދުތަކަށް ގެންނަވަންޖެހޭ ބަދަލުތައް ގެނައުމަށްވެސް ރައީސުލްޖުމްހޫރިއްޔާގެ އޮފީހުން ވަނީ ވިދާޅުވެފައެވެ.

ސަރުކާރުގެ މިނިންމުމާއި ގުޅިގެން ފަތުރުވެރިކަމުގެ އެންމެ ދުވަސްވީ އަދި އެންމެ ބޮޑު ޖަމިއްޔާ މަޓާޓޯއިން ވަނީ އެކަން އެގޮތަށް ނުކުރުމަށް ގޮވާލައި ބަޔާނެއްވެސް ނެރެފައެވެ. ވަޒީރުންގެ މަޖިލީހުން އެކަން ނިންމަވާފައިވާ ކަން އިއްޔެ ރައީސުލްޖުމްހޫރިއްޔާގެ އޮފީހުން ބޭއްވި ނޫސްވެރިންގެ ބައްދަލުވުމުގައި އިކޮނޮމިކް މިނިސްޓަރު ވިދާޅުވިއެވެ.

ރާއްޖޭގެ މާލީ ހާލަތު ވަރަށް ބޮޑަށް ގޯސްވެފައި ވާއިރު، ދައުލަތަށް ޑޮލަރު ލިބުން ވަރަށް ބޮޑަށްވަނީ ދަތިވެފައެވެ.