ބީއެމްއެލްގެ ނިންމުމަކީ ބަޣާވާތެއްކުރަން އުޅުންކަމަށް ބަލައިގެން ފުލުހުން މައްސަލަ ތަޙްޤީޤު ކުރަން ފަށައިފިއެވެ.

ފުލުހުންގެ އިދާރާއިން ދާދި ދެންމެ އަކު ނެރުނު ބަޔާނެއްގައި ވިދާޅުވީ، ސަރުކާރުގެ މައި ހިއްސާ އޮންނަ ބޭންކަކުން ސަރުކާރުގެ މަޝްވަރާއާއި ޚިލާފަށް ދިވެހި ގިނަ ރައްޔިތުންނަށް ކުއްލި ސިހުމެއް ލިބޭ ގޮތަށް، ނިންމުމެއް ނިންމި ވަގުތާއި ދިމާކޮށް، ސިޔާސީ ފަރާތްތަކަކުން ސަރުކާރުގެ މާލީ ހަލާތާއި ގުޅޭ ގޮތުން ނޫސްވެރިންގެ ބައްދަލުވުން ބާއްވައި، ހަމަ އެވަގުތު ސޯޝަލް މީޑިއާ އެތައް ސަތޭކަ ބޮޓް އެކައުންޓް ބޭނުންކޮށް ސަރުކާރު ވައްޓާލަން މަގުތަކަށް ނުކުތުމަށާއި އާއްމު ހަމަޖެހުން ނަގާލުމަށް ގޮވާލައި، ޤައުމުގެ މަސްލަހަތު ނަގާލުމަށް ހިއްވަރުދީ ހަދާފައި ވާތީ، އެކަމަކީ ޤާނޫނީ ސަރުކާރެއް ޣައިރު ޤާނޫނީ ގޮތުން ބަދަލުކޮށްލުމަށް ރޭވިގެން ދިޔަ ކަމެއްކަމަށް ބެލުމުގެ ޖާގަ އޮތުމުން އެމައްސަލަ ފުލުހުން ތަޙްޤީޤު ކުރަން ފަށާފައިވާ ކަމަށެވެ.

މިހާރު ޕީއެންސީގެ ހަރުގޭގައި ކުރިޔަށް ގެންދާ ހަރުގެ ޖަލްސާގައި، ފިޝަރީޒް މިނިސްޓަރ އަހްމަދު ޝިޔާމް ވަނީ، ބޭންކުގެ ސީއީއޯ، އަދި މެނޭޖިން ޑައިރެކްޓަރ ކާރލް ސުޓުމްކް ވަގުތުން އިސްތިއުފާ ދެއްވުމަށް ގޮވާލައްވާފައެވެ. މީގެ އިތުރުން އިއްޔެއިން ފެށިގެން ސަރުކާރުގެ އިސް މަޤާމުތަކުގައި ތިއްބެވި ފަރާތްތަކުން ދަނީ، ބީއެމްއެލްގެ ބޯޑުގައި ތިއްބެވި މެމްބަރުން އުޅުއްވީ، އެމްޑީޕީއާ އާއި ގުޅިގެން ބަޣާވާތެއް ގެންނަން ކަމުގައި ބުނެ އެބޯޑުގެ މެމްބަރުން ވަކިކުރުމަށް ގޮވާލަމުންނެވެ.

ބީއެމްއެލްއިން އިއްޔެ ވަނީ، އެބޭންކުން ދޫކޮށްފައިވާ ރުފިޔާ ކާޑުތަކުން ޑޮލަރުން މުއާމަލާތް ކުރުމަށް ދީފައިވާ އެލަވަންސްތައް ދިނުން ހުއްޓާލުމަށް ނިންމައި އެކަން އިޢުލާނުކޮށްފައެވެ. އެކަމާއި ގުޅިގެން ސަރުކާރުން ޕްރެޝަރުކޮށްގެން އެނިންމުން ހަމަ އިއްޔެ ވަނީ ބޭންކުން ބަދަލުކޮށްފައެވެ.