މި ޖީލު ދުށް އެންމެ މޮޅު ދެ ފުޓުބޯޅަ ކުޅުންތެރިން ކަމުގައިވާ، ޕޯޗުގަލްގެ ކްރިސްޓިއާނޯ ރޮނާލްޑޯ އާއި އާޖެންޓީނާގެ ލިއޮނެލް މެސީގެ އުމުރުން 24 އަހަރު ގޯލު ޖަހަމުން އައި މިންވަރާއި، މެންޗެސްޓަރ ސިޓީގެ ނޯވޭ ފޯރވާޑް، އަރލިންގް ހާލަންޑު މި އުމުރުގައި ގޯލުޖަހަމުން އަންނަ މިންވަރު މާ ގިނައެވެ.

އުމުރުން 24 އަހަރުގައި ހާލަންޑު މިވަނީ އޭނާގެ ޕްރޮފެޝަނަލް ކެރިއާރގައި ކުޅުނު 315 މެޗުން 260 ގޯލު ކާމިޔާބުކޮށްފައެވެ. އޭނާގެ މި ރެކޯޑަކީ މެސީ އާއި ރޮނާލްޑޯ އާ އަޅާކިޔާއިރު، ވަރަށް ތަފާތު ރެކޯޑެކެވެ.

އެގޮތުން އުމުރުން 24 އަހަރުގައި، ނުވަތަ ހާލަންޑު މިހާރު އެ ހުރި ސްޓޭޖުގައި، ރޮނާލްޑޯއަށް 362 މެޗުން ކާމިޔާބު ކުރެވުނީ 132 ގޯލެވެ. އަދި 326 މެޗުން މެސީއަށް ކާމިޔާބު ކުރެވުނީ 197 ގޯލެވެ. އެހެންކަމުން ހާލަންޑު މިވަނީ މެސީއަށް ވުރެން 63 ގޯލު އަދި ރޮނާލްޑޯއަށް ވުރެން 128 ގޯލު އިތުރަށް ކާމިޔާބުކޮށްފައެވެ.

މި މުއްދަތުގައި މެސީ ކުޅެފައިވަނީ ބާސެލޯނާއަށެވެ. އަދި ރޮނާލްޑޯ ވަނީ މެންޗެސްޓަރ ޔުނައިޓެޑުގެ އިތުރުން ސްޕޯޓިން ލިޒްބަންއަށް ވެސް ކުޅެފައެވެ.

މިކަމުގައި އޮތް ހަމައެކަނި ތަފާތަކީ، ކެރިއަރުގެ ކުރީކޮޅު މެސީއާއި ރޮނާލްޑޯ ސެންޓްރަލް ފޯވާރޑުންގެ ގޮތުގައި މަދުން ނޫނީ ކުޅެފައި ނުވުމެވެ. މި ދެ ކުޅުންތެރިން ކުރިން ބޮޑަށް ކުޅެފައިވަނީ ދެ އަރިމަތިންނެވެ. ހާލަންޑު މުޅިންވެސް ކުޅެނީ ސެންޓްރަލް ފޯވާޑަށެވެ.

މި ސީޒަނުގެ ފުރަތަމަ ދެ މެޗުން ހާލަންޑު ވަނީ 4 ގޯލު ކާމިޔާބު ކޮށްފައެވެ. މީގެ ތެރޭގައި، މިދިޔަ ހޮނިހިރު ދުވަހު އިޕްސްވިޗް ކޮޅަށް ހެދި ހެޓްރިކް ވެސް ހިމެނެއެވެ.