މަޖީދިއްޔާ ސްކޫލަށް، 100 އަހަރު ފުރުން ފާހަގަކުރުމުގެ ގޮތުން، ބިނާކުރި، "ސައްތަވީ ބިނާ" ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރޭ އިފްތިތާޙްކޮށްދެއްވައިފިއެވެ. 

މިބިނާ އެމަނިކުފާނު އިފްތިތާޙްކޮށްދެއްވީ، ރޭ އެކަމަށްޓަކައި ބޭއްވި ޚާއްޞަ ރަސްމިއްޔާތުގައެވެ.

މިބިނާ އިފްތިތާޙްކޮށްދެއްވުމަށް ފަހުގައި، ރައީސުލްޖުމްހޫރިއްޔާ ވަނީ، މި މަޖީދިއްޔާ ސްކޫލުގެ ދާރުލް އުލޫމް ހޯލުގައި ކުރިއަށްދާ ފޮޓޯ މައުރަޒު ބައްލަވާލައްވާފައެވެ.

މަޖީދިއްޔާ ސްކޫލުގެ "ސައްތަވީ ބިނާ" ފަރުމާކޮށް އެބިނާ ހެދުމުގެ މަސައްކަތްކޮށްފައި ވަނީ، މަޖީދިއްޔާ ސްކޫލުގެ މުސްކުޅި ދަރިވަރުންނެވެ.

މަޖީދިއްޔާ ސްކޫލް ހުޅުވުނީ، 1927 ވަނަ އަހަރުގެ އެޕްރީލް މަހުގެ 19 ވަނަ ދުވަހުއެވެ. އެސްކޫލަށް 100 އަހަރު ފުރެން ދެން ބާކީ އޮތީ ދޮޅުއަހަރެއްހައި ދުވަހެވެ. 

މަޖީދިއްޔާ ސްކޫލަކީ، ރާއްޖޭގައި އެންމެ ފުރަތަމަ ހުޅުވުނު ރަސްމީ ތަޢުލީމުދޭ ސްކޫލެވެ.