ރާއްޖޭގެ އިޤުތިޞާދީ ޙާލަތުގެ ކަންބޮޑުވުންތައް ހާމަކުރައްވައި، ކުރީގެ އިކޮނޮމިކް މިނިސްޓަރ ފައްޔާޒު އިސްމާޢީލް ޓްވިޓާގައި ކުރެއްވި ޕޯސްޓަށް، މިހާރުގެ އިކޮނޮމިކް މިނިސްޓަރ މުޙައްމަދު ސަޢީދު ޖަވާބު ދެއްވުމުން. ފައްޔާޒުވެސް ސަޢީދަށް ރައްދު ދެއްވައި މިސަރުކާރަކީ، ޤާބިލްކަމެއް އަދި ތަޞައްވަރެއްވެސް ނެތް ސަރުކާރެއް ކަމުގައި ވިދާޅުވެއްޖެއެވެ.

ބީއެމްއެލްގައި 42 އަހަރަށް ވުރެ ގިނަ ދުވަހު ޚިދުމަތް ކުރައްވާފައިވާ އަދި އެ ބޭންކުގެ ބޯޑު މެމްބަރެއްގެ ގޮތުގައި ހުންނެވި އައިޝަތު ނޫރައްދީން، ޕީސީބީން، މަޤާމުން ވަކިކުރުމާއި ގުޅިގެން ފައްޔާޒު ވަނީ ކަންބޮޑުވުން ފާޅު ކުރައްވާފައެވެ. 

އެކަމުގެ ކަންބޮޑުވުން ފާޅުކުރައްވައި ފައްޔާޒު ވިދާޅުވީ، މާލީ ނިޒާމުގެ ނަޒާހަތްތެރިކަން ދެމެހެއްޓުމުގެ ގޮތުން ވެސް ބޭންކް އޮފް މޯލްޑިވްސްއަށް ސަރުކާރުން ނުފޫޒު ފޯރުވުން ހުއްޓާލަން ޖެހޭ ކަމަށެވެ.  ބީއެމްއެލްއަކީ އިގުތިސޯދުގެ މުހިންމު ބައެއްކަމާއި މިނިވަންކަމާއެކު ބޭންކު ހިނގުމަށް ފުރުޞަތު އޮންނަން ޖެހޭނެ ކަމުގައިވެސް އޭނާ ފައްޔާޒު ވިދާޅުވިއެވެ.

ފައްޔާޒު ދެއްކެވި ވާހަަކަފުޅަށް މިސަރުކާރުގެ އިކޮނޮމިކް މިނިސްޓަރ މުޙައްމަދު ސަޢީދު ވަނީ އެކްސްގައި ރައްދު ދެއްވާފައެވެ. އައިޝަތު ނޫރައްދީން ބީއެމްއެލްގެ ބޯޑުން ވަކިކުރުން ދިފާޢު ކުރައްވައި، ސަޢީދު ވިދާޅުވީ، ވަކި މީހަކަށްވުރެ ޤައުމުގެ މަސްލަޙަތު މާމުހިއްމު ކަމަށެވެ.

ސަޢީދަށް ރައްދު ދެއްވައި، އެމްޑީޕީގެ ޗެއާޕާސަން އަދި އިކޮނޮމިކް މިނިސްޓަރ ފައްޔާޒު އިސްމާޢީލް ވިދާޅުވީ، އެމްޑީޕީން އިޤުތިޞާދު އަޑިއަޅުވައިލި ކަމަށް ބުނާއިރު، މިސަރުކާރާއި މިނިސްޓަރ ސަޢީދުވެސް ސަރުކާރަށް ވަޑައިގެންނެވީ، އަދި ކެމްޕޭންތެރޭގައި ރައްޔިތުންނަށް ވަޢުދުވެވަޑައިގަންނަަވަމުން އައީ އިޤުތިޞާދު ހަމަމަގަށް އަޅުވާނެ ކަމަށް ކަމަށެވެ. އަދި ރައްޔިތުން މިސަރުކާރަށް ވޯޓު ދިނީވެސް އެވަޢުދުތައް ފުއްދާނެ ކަން ޤަބޫލުކޮށްގެން ކަމަށާއި، ކުރީ ސަރުކާރޭ ކިޔައި ކިޔައި ތިބުމުގެ ބޭނުމެއް ނެތް ކަމަށާއި ރައްޔިތުން އެދެނީ އެގޮތް ނޫންކަންވެސް ފައްޔާޒު ފާހަގަކުރެއްވިއެވެ. އެހެން ނަމަވެސް ވެރިކަމަށް ނުވަމަސް ވެގެންދާއިރު ފެންނަމުން ދަނީ ކޮންމެ ކަމެއްގައި ކުރީ ސަރުކާރުގެ ވާހަކަ ދައްކާތަން ކަމަށާއި ރައްޔިތުން ބޭނުން ވަނީ ހައްލު ކަމުގައި ފައްޔާޒު ވިދާޅުވިއެވެ.

ފައްޔާޒު ވަނީ، ރާއްޖެ އިޤުތިޞާދީ އަމާން ބަނދަރަކަށް ގެންގޮސްދެއްވުން އެދޭ ކަމަށާއި، އެހެން ނަމަވެސް މިސަރުކާރުގައި އެފަދަ ތަޞައްވަރެއް އަދި ޤާބިލް ކަމެއްވެސް ނެތްކަން ފާހަގަކުރައްވާފައެެވެ.

ރާއްޖޭގެ އިޤުތިޞާދީ ހާލަތު އިންތިހާއަށް ގޯސްވެ، ދައުލަތް ދަރަނިވެރިވެ، އާއްމު އަސާސީ ބޭނުންތަކަށް މަރުކަޒީ ބޭންކުގައި ހުންނަ ޑޮލަރުގެ ރިޒާވްވެސް ހުސްވެފައިވާ ކަމުގެ އަޑުތައް ވަނީ ފެތުރިފައެެވެ. އެމްއެމްއޭއިން އެކަން ދޮގުކުރި ނަމަވެސް ރިޒާވާއި ގުޅޭ ގޮތުން އެމްއެމްއޭއިން އިތުރު ވާހަކައެއް ނުދައްކައެވެ.

މިނިސްޓަރ ފައްޔާޒު ވަނީ، ފައިސާ ޗާޕުކޮށް، ސޮވެރިންގ ފަނޑުގައި ހުރި ފައިސާގައިވެސް މިސަރުކާރުން އަތްލާނެކަން ފާހަގަކުރައްވާފައެވެ.