ބިންވެރިޔާ ސްކީމުގެ ދަށުން ހުޅުމާލެއިން ދިރިއުޅުމަށް ދޫކޮށްފައިވާ ގޯތިތަކުގައި ކާބޯތަކެތީގެ ވިޔަފާރި ހިންގަމުން އައިތަންތަން ސަރުކާރުން ބަންދުކޮށްފިއެވެ.

ރޭ މިތަންތަން ބަންދުކޮށްފައި ވަނީ، ރާއްޖޭގައި ޤަވާއިދާއި ޚިލާފަށް އުޅޭ ބިދޭސީންގެ މައްސަލައަށް ހައްލު ހޯދުމަށް އިމިގްރޭޝަނާއި ފުލުހުން ގުޅިގެން އުފެއްދި ޓާސްކްފޯހުން ހިންގަމުންދާ އޮޕަރޭޝަންގެ ތެރެއިންނެވެ. މިގޮތުން އިއްޔެ ވަނީ، އެޓާސްކް ފޯހުގައި މިނިސްޓްރީ އޮފް ހެލްތާއި އިކޮނޮމިކް މިނިސްޓްރީވެސް ހިމަނައި، މިހާރު ކުރިޔަށް ގެންދާ ބަލައިފާސްކުރުމުގެ އޮޕަރޭޝަންގެ ތެރެއިން ޤަވާއިދާއި ޚިލާފުވާކަމަށް ފާހަގަކުރެވޭ ތަންތަން ވަގުތުން ބަންދުކުރަމުންނެވެ.

މިގޮތުން ހުޅުމާލެ ފޭސް 2 ގެ ހިޔާ ޓަވަރުތަކުގައި ކައިރިންނާއި ވިނަރެސް ޓަވަރުތަކުގެ އިރުމަތީގައި ހުރި ބިންތަކުން ދޫކޮށްފައިވާ ގޯތިތަކުގައި ހުރި ކާބޯތަކެތީގެ ޚިދުމަތްދޭ ތަންތަން ވަނީ ބަންދުކޮށްފައެވެ.

އެތަންތަން ރޭ ބަންދު ކުރި ނަމަވެސް އޭގެ ތެރެއިން ބައެއް ތަންތަން އަލުން ހުޅުވައިގެން މިއަދުވެސް ޚިދުމަތް ދެމުން އަންނަކަން ފާހަގަކުރެވިފައިވެއެވެ.

ބަންދުކުރި ތަނެއްގައި އެޗްޕީއޭއިން ހިއްޕާފައިވާ ނޯޓިސް ---

ރޭ ހުޅުމާލެ ފޭސް 2 އިން ބަންދު ކުރިތަންތަނުގެ ތެރޭގައި، ވިޔަފާރި ހުއްދަ ނަގައިގެން އެހެން ނަމަވެސް ކާބޯތަކެތި ވިއްކުމުގެ ހުއްދަ އެމްއެފްޑީއޭއިން ނުނަގައި ދިވެހިން ހިންގަމުން އައި ބައެއް ތަންތަންވެސް ހިމެނެއެވެ. އެތަންތަން ބަންދުކޮށް އެޗްޕީއޭއިން ހިއްޕާފައިވާ ނޯޓިހުގައި ބުނެފައި ވަނީ، އެތަންތަން ބަންދުކޮށްފައި ވަނީ އާއްމު ސާފުތާހިރުކަން ދައްވުމުގެ ސަބަބުން އާއްމު ޞިއްޙަތަށް ނުރައްކާވެދާނެ ފަދަ ކަމެއް ކުރިމަތިވެދާނޭ ކަމަށް ފެންނާތީ، އެތަނުގައި ކުރަމުންގެންދިޔަ ކާބޯތަކެތީގެ ޚިދުމަތް ދިނުމުގެ މަސައްކަތް ހުއްޓާލުމަށް އަންގާފައި ވަނީ، އާއްމު ޞިއްޙަތު ރައްކާތެރިކުރުމުގެ ޤާނޫނުގެ 43 ވަނަ މާއްދާގެ (ހ)ގެ ދަށުން ކަމަށެވެ.

ފޭސް 2 ގައި ދިވެހިން ހިންގަމުން ދިޔަ ކާބޯތަކެތީގެ ޚިދުމަތްދޭ ތަންތަން ބަންދުކުރުމުން އެ ވިޔަފާރި ކުރަމުންދިޔަ މީހުންނާއި ޚިދުމަތް ހޯދަމުންދިޔަ ބައެއް މީހުން ވަނީ ނުރުހުން ފާޅުކޮށްފައެވެ.