ބަންގި ގޮވުމާއި އިމާމުވެ ނަމާދު ކުރުމަށް ޝައުގުވެރިކަން ހުންނަ ކުޑަކުދިންނަށް އެ ފުރުސަތު ތަނަވަސްކޮށްދިނުމުގެ ގޮތުން އުލިގަމު ކައުންސިލުން އުސޫލެއް ކަނޑައަޅައިފިއެވެ. އެ އުސޫލުގައި ބުނެފައިވާ ގޮތުން، އެ ކަމުގެ މަގްސަދަކީ ކުޑަކުދިންގެ ހިތްތަކުގައި ނަމާދަށް ލޯބި ޖެއްސުމާއި އެ ކުދިންނަކީ ދީނަށް ލޯބިކުރާ ކުދިންތަކެއް ކަމުގައި ހެދުމެވެ. އަދި އެ ކުޑަކުދިންނަކީ ބަންގި ގޮވައި، އިމާމުވެ ނަމާދު ކުރުމަށް ފަސްނުޖެހޭނެ ކުދިންކަމުގައި ހެދުމަކީ ވެސް އެ އުސޫލުން ހާސިލް ކުރަން ބޭނުންވާ މަގްސަދެކެވެ.

މި އުސޫލުގެ ދަށުން ބަންގި ގޮވުމާއި އިމާމުވެ ނަމާދު ކުރުމުގެ ހުއްދަ ދެނީ އެ ރަށުގައި ހުންނަ ސަރުކާރުގެ މިސްކިތްތަކުންނެވެ. ނަމަވެސް، މި ފުރުސަތު ލިބޭނީ މިސްކިތްތަކުގެ އިމާމުން ބަލައި ޓެސްޓް ކުރުމަށްފަހު އެކަން ކުރެވޭނެ ޤާބިލުކަން ހުރި ކަމަށް ކަނޑައަޅާ ކުދިންގެ މަޢުލޫމާތު ކައުންސިލަށް އެންގުމުން، ކައުންސިލުން ލިޔުމުން ހުއްދަ ދޫކޮށްފައިވާ ކުދިންނަށެވެ.

ހުއްދަ ދޫކުރެވޭ ކުދިންގެ އިތުރު ޝަރުތުތަކެއް ވެސް ފުރިހަމަވާން ޖެހެއެވެ. އެގޮތުން ބަންގި ގޮވުމުގެ ފުރުސަތު ހޯދުމަށް އުމުރުން 7 އަހަރު ވެފައި ވުމާއި، ބަންގި ގޮވައި އިމާމުވެ ނަމާދު ކުރުމަށް އުމުރުން 14 އަހަރު ފުރިފައި ވާން ޖެހެއެވެ.

މީގެ އިތުރުން ބަންގި ގޮވައި އިމާމުވެ ނަމާދުކުރަން އެދޭ ކުދިންގެ ކިބައިގައި ނަމާދުކުރާއިރު ހުންނަންޖެހޭ ޙުޝޫޢަތްތެރިކަން ހުރުމާއި، ބެލެނިވެރިޔާގެ ހުއްދަ ލިބިފައި ވުމާއި، ބަންގި ގޮވާ ކުއްޖާ އަކީ ބަންގީގެ ކަލިމަތައް ސާފުކޮށް އެނގޭނޭ ގޮތަށް އަކުރުގެ މަޚްރަޖާއިއެކު ކިޔަން ދަންނަ ކުއްޖެއް ކަމުގައި ވުމާއި، އިމާމުވެ ނަމާދު ކުރާ ކުއްޖާއަށް ނަމާދުގެ ރުކުންތައް ފުރިހަމައަށް ކުރުމަށާއި، އިމާމުވެ ނަމާދު ކުރެވޭ ފެންވަރަށް ނަމާދުގެ ފިޤުޙު ދަންނަ ކުއްޖަކަށް ވުން ހިމެނެއެވެ. އަދި ފަރިތަކޮށް ކީރިތި ޤުރުއާނުގެ ސޫރަތުއް ޟުޙާއިން ތިރީގެ ސޫރަތްތައް ހިތުން، އަކުރުގެ މަޚްރަޖާއި ތަޖުވީދުގެ ހަމަތަކުގެ މަތިން ކިޔަން ދަންނަ ކުއްޖަކަށް ވާންވާނެކަމަށް ވެސް އެ އުސޫލުގައި ބުނެފައިވެއެވެ.