ރައީސުލްޖުމްހޫރިއްޔާގެ ނައިބު އިއްޔެ އިފްތިތާޙްކޮށްދެއްވި "އެޑިއުކޭޝަން ޓްރާންސްފޯރމޭޝަން އިނީޝިއޭޓިވް" ޕްރޮޖެކްޓްގައި ބޭނުން ކުރާ، 9.5 މިލިޔަން ޑޮލަރު (146.5 މިލިޔަން ދިވެހި ރުފިޔާ)ގެ ހިލޭއެހީއަކީ ކުރީ ސަރުކާރުން ހޯދި އެހީއެއް ކަން ކުރީގެ އެޑިޔުކޭޝަން މިނިސްޓަރ އައިޝަތު ޢަލީ ހާމަކުރައްވައިފިއެވެ.

ޑރ. އައިޝަތު ޢަލީ މިކަން ހާމަކުރެއްވި އިރު، ގްލޯބަލް ޕާޓްނަޝިޕް ފޯ އެޑިއުކޭޝަން (ޖީ.ޕީ.އީ)އިން ރާއްޖޭގެ ތަޢުލީމީ ދާއިރާއަށް، ތަފާތު 3 ގްރާންޓެއްގެ ދަށުން ދީފައިވާ، 9.5 މިލިޔަން ޑޮލަރު (146.5 މިލިޔަން ދިވެހި ރުފިޔާ)ގެ ހިލޭއެހީ ބޭނުންކޮށްގެން ހިންގާ، "އެޑިއުކޭޝަން ޓްރާންސްފޯރމޭޝަން އިނީޝިއޭޓިވް" ޕްރޮޖެކްޓް އިއްޔެ ސަރުކާރުން އިފްތިތާޙް ކުރީ، މިސަރުކާރުން މިފާއިތުވި 9 މަސް ދުވަހުގެ ތެރޭގައި ހޯދި ފަންޑިންކަމަށް ދޭހަވާ މޭރުމުންނެވެ.

ރައީސުލްޖުމްހޫރިއްޔާގެ އޮފީހުން ހާމަކުރައްވާފައިވާ ގޮތުގައި، އޭގެ ތެރެއިން ފުރަތަމަ ގްރާންޓަކީ ގްރާންޓް އެޖެންޓުގެ ގޮތުގައި ޔުނިސެފު ހަރަކާތްތެރިވާގޮތަށް ހޯދާފައިވާ 5 މިލިޔަން އެމެރިކާ ޑޮލަރުގެ ސިސްޓަމް ޓްރާންސްފޮމޭޝަން ގްރާންޓެވެ. ދެވަނަ ގްރާންޓަކީ ގްރާންޓް އެޖެންޓުގެ ގޮތުގައި ޔުނިސެފް ހަރަކާތްތެރިވާގޮތަށް ހޯދާފައިވާ 1.5 މިލިޔަން ޑޮލަރުގެ ސިސްޓަމް ކެޕޭސިޓީ ގްރާންޓެކެވެ. ތިން ވަނަ ގްރާންޓަކީ ގްރާންޓް އެޖެންޓެއްގެ ގޮތުގައި ވަރލްޑް ބޭންކު ހަރަކާތެރިވާގޮތަށް ހަމަޖެހިފައިވާ 3 މިލިއަން ޑޮލަރުގެ މަލްޓިޕްލަޔަރ ގްރާންޓެވެ.

ކުރީގެ އެޑިޔުކޭޝަން މިނިސްޓަރ އައިޝަތު ޢަލީ ވިދާޅުވީ، 9.5 މިލިއަން ޑޮލަރުގެ މިތިން ގްރާންޓް ރާއްޖެއަށް ކާމިޔާބު ކުރެވުނީ، ހުސްވި އަހަރުގެ އޮގަސްޓް މަހުގައި ކަމަށެވެ.  އަދި 15 އޮކްޓޯބަރ 2020ގައި މި ގްރާންޓްއަށް އެދުމުގެ ފުރުސަތު ރާއްޖެއަށް އޮތްކަން އެނގުމާއެކު ގިނަ ބައެއްގެ ބުރަ މަސައްކަތާއެކު ޕާރޓްނަރޝިޕް ކޮމްޕެކްޓްއާއި މަލްޓިޕްލަޔަރ ގްރާންޓް ތައްޔާރުކޮށް ހުށައެޅުނީ، ޖުލައި 2023ގައިކަން ވެސް މިނިސްޓަރ ފާހަގަކުރައްވާފައިވެއެވެ.

ކުރީގެ އެޑިޔުކޭޝަން މިނިސްޓަރ ޑރ. އައިޝަތު ޢަލީ ވިދާޅުވީ، އެ ގްރާންޓްއަށް އެދެން ކޮމްޕެކްޓް ފަރުމާކުރީ ރައީސް ޞާލިޙުގެ ތަޢުލީމީ ސިޔާސަތުގެ ދަށުން، ކިޔަވައިދިނުމުގެ ފެންވަރު ރަގަޅުކުރުމަށާއި އިކުއިޓީ އާއި އިންކުލޫޝަން އަދި ޖެންޑަރ އިކުއިޓީއަށް ފޯކަސްކޮށް މުޅި ރާއްޖޭގެ ތަޢުލީމީ ދާއިރާއަށް އިންޤިލާބީ ބަދަލެއް ގެނައުމުގެ ނިޔަތުގައި ކަމަށެވެ. އަދި އުއްމީދު ކުރައްވަނީ، މި ގްރާންޓްގެ އެހީގައި ރާއްޖޭގެ ތަޢުލީމީ ދާއިރާއަށް އިންޤިލާބީ ބަދަލެއް އަންނާނޭކަމަށް ކަމުގައިވެސް އެކަމަނާ ވިދާޅުވެފައިވެއެވެ.