ކާރިސާތަކުގެ ވަގުތުގައި ގުޅިގެން މަސައްކަތް ކުރުމާއި ގުޅޭ ފަހުމުނާމާއެއްގައި އެންޑިއެމްއޭއާއި ސްޓެލްކޯއިން ސޮއިކޮށްފިއެވެ.

މިފަހުމުނާމާގައި ނޭޝަނަލް ޑިޒާސްޓަރ މެނޭޖްމެންޓް އޮތޯރިޓީ އާއި އެންޑީއެމްއޭއިން ސޮއެކޮށްފައި ވަނީ، އިއްޔެއެވެ. ސްޓެލްކޯގެ ފަރާތުން މިފަހުމުނާމާގައި ސޮއިކުރެއްވީ ކުންފުނީގެ މެނޭޖިންގ ޑިރެކްޓަރ ޙުސައިން ފަހުމީއެވެ. އަދި ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީގެ ފަރާތުން ސޮއިކުރެއްވީ އެ އޮތޯރިޓީގެ ޗީފް އެގްޒެކެޓިވް ހިސާން ޙަސަންއެވެ.

ސްޓެލްކޯއިން ހާމަކުރައްވާފައިވާ ގޮތުގައި މިފަހުމް ނާމާގެ ދަށުން، ސްޓެލްކޯގެ މަސައްކަތްތައް ހިންގުމަށް މިހާރު ރާވާފައިވާ ނިޒާމުތަކުގައި ހުރި ނިޒާމީ ހިރާސްތައް ދެނެގަތުމަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީން އެހީތެރިކަން ފޯރުކޮށްދޭނެ ކަމަށެވެ. އަދި ސްޓެލްކޯގައި މިހާރު އެކުލަވާލާފައިވާ ކްރައިސިސް މެނޭޖްމަންޓްގެ އޮނިގަނޑުތައް ދިރާސާކޮށް، ތަޖުރިބާކާރުންގެ އެހީތެރިކަމާއެކު ކުންފުނީގެ ކްރައިސިސް މެނޭޖްމަންޓާއި، ކުއްލި ޙާލަތު އިޖާބައިގެ ޤާބިލްކަމުގެ އޮނިގަނޑު އަދި (ކްރައިސިސްގެ ވަގުތުގައި) ޚިދުމަތް ކުރިއަށްގެންދިއުމުގެ އެނަލިސިސް އެއް ހަދައި ރަނގަޅު ކުރެވެން ހުރި ކަންކަން ދެނެގަނެވޭނެ ކަމުގައި އެކުންފުނިން ހާމަކުރައްވާފައިވެއެވެ.

އެން.ޑީ.އެމް.އޭ އާއި ސްޓެލްކޯއިން ފަހުމުނާމާގައި ސޮއެކުރުން --

މީގެ އިތުރުން ސްޓެލްކޯގައި އައު ކްރައިސިސް މެނޭޖްމަންޓް ޕްލޭނެއް ޤާއިމްކުރުމަށް، ހީރާސްތަކާއި ގުޅިގެން އަމަލުކުރާނެ ގޮތާއި ކުންފުނީގެ އެތެރޭގައި ބޭނުންކުރާނެ ކްރައިސިސް މެނޭޖްމަންޓް ފްރޭމްވަރކްއެއް އެކުލަވާލެވޭނެ ކަމުގައިވެސް އެކުންފުނިން ބުނެފައިވެއެވެ. މިގޮތުން ކުންފުނީގައި ކޮމްޕެނީ އެމަރޖެންސީ ރެސްޕޮންސް ޓީމެއް އެކުލަވާލައި، އެ މަސައްކަތަށް ސްޓެލްކޯގެ މުވައްޒަފުންގެ ތެރެއިން ޓީމެއް ތަމްރީނުކުރުމާއި، އެކްސަރސައިޒްތައް ހިންގުމަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީން އެހީތެރިކަން ފޯރުކޮށްދިނުންވެސް އެ ފަހުމު ނާމާގެ ދަށުން ކުރުމަށް ހަމަޖެހިފައިވާ ކަންކަމުގެ ތެރޭގައި ހިމެނޭ ކަމުގައިވެސް ސްޓެލްކޯއިން ހާމަކުރައްވާފައި ވެއެވެ. އަދި ކުއްލިޙާލަތުގައި ރައްކާތެރިކަމާއެކު ސްޓެލްކޯގެ އިމާރާތްތަކުން މީހުން ހުސްކުރުމަށް މިހާރު އެކުލަވާލާފައިވާ ޕްލޭންތައް ވިލަރެސްކޮށް، އެފަދަ ޕްލޭންތައް އަދާހަމަކުރުންވެސް މިއެއްބަސްވުމުގެ ދަށުން ކުރުމަށް ކަނޑައަޅާފައިވާ ކަންތައްތަކުގެ ތެރޭގައި ހިމަނާފައިވެއެވެ.

ސްޓެލްކޯއަކީ، މާލެ ސަރަހައްދުގެ ކަރަންޓް ޚިދުމަތް ދިނުމަށް ސަރުކާރުން އުފައްދާފައިވާ ކުންފުންޏެކެވެ. މާލެ ސަރަހައްދާއި މުޅި ރާއްޖޭގެ އިޤުތިޞާދީ ހަރަކާތްތަކާއި އުފެއްްދުންތެރިކަމާއި އެނޫންވެސް ޚިދުމަތްތައް ބިނާވެފައި ވަނީ، ސްޓެލްކޯއިން އުފައްދައި ފޯރުކޮށްދޭ ހަކަތައަށެވެ.

ސްޓެލްކޯ ފިޔަވައި މާލެ ސަރަހައްދުގައި ޔުޓިލިޓީ ޚިދުމަތްދޭ އަނެއް ކުންފުނި އެމްޑަބުލިޔުއެސްސީގެ ފެންޕްލާންޓްގެ ޕެނަލް ބޯޑުގައި ރޯވެ ހިނގި އަލިފާނުގެ ހާދިސާ އަކާއި ގުޅިގެން މުޅިމާލެއިން ފެންކެނޑި، ހަފްތާއެއްހައި ދުވަހު މާލެ ސަރަހައްދުގައި ދިރިއުޅޭ ދޮޅުލައްކައެއްހައި ރައްޔިތުންނަށް ވަރަށް ބޮޑެތި އުނދަގޫތަކާއި ތަކްލީފްތައް އުފުލަން ޖެހުނެވެ.