ރާއްޖޭގެ 58 އަހަރު ފުރޭ 59 ވަނަ މިނިވަންދުވަހުގެ މުނާސަބަތުގައު ބޭއްވި ފުޅަނދު ބުރުގައި ސްޓޭޓް އިލެކްޓްރިކް ކޮމްޕެނީ ލިމިޓެޑް، ސްޓެލްކޯއިން ވެސް ވަނީ ބައިވެރިވެފައެވެ. އެގޮތުން ސްޓެލްކޯގެ ފްލީޓްގައި ތިން ފުޅަނދެއް ދައްކުވައިދިނެވެ.

ސްޓެލްކޯގެ ފުރަތަމަ ފުޅަނދުން ދައްކުވައިދިނީ ރާއްޖޭގެ ޗާލު ގޮނޑުދޮށެވެ. ސްޓެލްކޯއިން ހާމަކޮށްފައިވާ ގޮތުގައި އެ ގޮނޑުދޮށުން އެ ރަމްޒުކޮށްދެނީ މިނިވަން މާހައުލެއްގައި ގްރީން އެނަޖީ ބޭނުންކުރާ ތަނެވެ. މީގެ އިތުރުން ޕްލާސްޓިކް ޕޮލިއުޝަންގެ ސަބަބުން ގޮނޑުދޮށްތަކަށް ކުރިމަތިވާ ނުރައްކާތައް ވެސް މި ފުޅަނދުން ދައްކުވައިދެއެވެ.

ސްޓެލްކޯގެ ދެވަނަ ފުޅަނދުން ދައްކުވައިދެނީ ޕްލާސްޓިކް ޕޮލިއުޝަނާއި ހެދި ކަނޑު އަޑީގެ ދިރުންތަކަށް ލިބެމުންދާ ގެއްލުންތަކެވެ. އެގޮތުން މަހެއްގެ އަނގައިގެ ތެރެއިން ޕްލާސްޓިކް ފުޅިތަކެއް މި ފުޅަނދުން ފެނުނެވެ.

އަދި ސްޓެލްކޯގެ ތިންވަނަ އަދި އެންމެ ބޮޑު ފުޅަނދުން ދައްކުވައިދިނީ، ކުޑަކުދިންގެ ތެރޭގައި މަޤްބޫލް "ފޯޓްނައިޓް" ގެ "ބެޓްލް ޕާސް" އެވެ. ފޯޓްނައިޓްގެ ކެރެކްޓަރސް އާއި ތިން ފުޅަނދު ވެސް ގުޅުވާލާފައި ވާއިރު މި ކެރެކްޓަރސްގެ އިތުރުން ސްޓެލްކޯއިން އަމިއްލައަށް އުފެއްދި ކެރެކްޓަރސް ވެސް މި ފުޅަނދުތަކުން ފެނިގެން ގޮސްފައިވެއެވެ.

އަމިއްލައަށް އުފެއްދި ކެރެކްޓަރސްތަކާއި ގުޅޭ ގޮތުން، ސްޓެލްކޯގެ ފުޅަނދުތައް ތަމްސީލުކުރި އެ ކުންފުނީގެ މުވައްޒަފަކު ބުނެފައިވަނީ، އެ ކެރެކްޓަރސްތަކަކީ އެ ކުންފުނީގެ ހީވާގި މުވައްޒަފުންގެ އިޖާދީ ވިސްނުން ކަމަށެވެ. އަދި އެ ކުދިންގެ އަމާޒަކީ އެ ކެރެކްޓަރސްތައް ދުނިޔޭގެ ފެންވަރުގައި ބޭނުން ކުރާނެ ފަދަ މަޤްބޫލް ކެރެކްޓަރސްތަކަކަށް ހެދުންކަން ފާހަގަކޮށްފައިވެއެވެ.