މީހަަކަށް ވަޒީފާ ދިނުމުގައި އޭނާ އަޅާ ހެދުމުގެ ސަބަބުން ތަފާތުކޮށްގެން ނުވާނެ ކަމުގައި ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، މޫނު ބުރުގާ އަޅާތީ، ދ. ހުޅުދެލީ މެޖިސްޓްރޭޓު ކޯޓުން މީހަކަށް ވަޒީފާ ނުދިން މައްސަލައެއް ފެންމަތިވުމާއި ގުޅިގެންނެވެ. އެތަފާތުކުރުމާއި ކުރިމަތިލާން ޖެހުނު އަންހެން މީހާ ވަނީ އެކަން ސޯޝަލް މީޑިއާގައި ޙިއްޞާކޮށްފައެވެ. 

ރައީސުލްޖުމްހޫރިއްޔާ ކުރެއްވި ޕޯސްޓުގައި ވިދާޅުވީ، އިސްލާމްދީނާއި ޚިލާފް ނުވާ ގޮތަށް ހެދުން އަޅާނަމަ، އެމީހަކު އަޅާފައި ހުންނަ ހެދުމެއްގެ ސަބަބުން ވަޒީފާދިނުމުގައި އަދި ވަޒީފާ އަދާކުރުމުގައި އެއްވެސް ތަފާތެއް ކޮށްގެންނުވާނެ ކަމަށެވެ. އަދި އެ ތަފާތުކުރުން ގެނުވާގޮތަށް ކުރީގައި ހަދާފައިވާ، އަދިވެސް ޢަމަަލުކުރަމުންދާ ހުރިހާ ގަވާއިދުތަކާއި އުސޫލުތައް ބަދަލު ކުރުމަކީ ކުރަންޖެހޭ ކަމެއް ކަމަށާއި، އެކަން ކުރުމަށް ކަމާބެހޭ ފަރާތްތަކަށް ވާނީ މިހާރު އަންގާފައި ކަމުގައިވެސް ރައީސުލްޖުމްހޫރިއްޔާ ވިދާޅުވެފައިވެއެވެ.

މޫނު ބުރިގާ އަޅާތީ، ވަޒީފާ ދިނުމަށް ހުރަސް އެޅޭ ގޮތަށް ހުރި ހުރިހާ ޤަވާއިދުތަކަކާއި އުސޫލުތައް ބަދަލުކުރުމަށް ރައީސުލްޖުމްހޫރިއްޔާ އެންގެވި އިރު، މޫނު ބުރުގާއަޅާ މީހުންނާއި މެދު ތަފާތުކޮށް އަމަލު ކުރުމުގެ މައްސަލަތައް މީގެ ކުރިންވެސް ފެންމަތިވެފައިވެއެވެ. އެކަން އެންމެ ބޮޑަށް ކުރިމަތިވީ ކުރީ ސަރުކާރުގައި މޫނު ބުރުގާ އަޅާތީ ޓީޗަރުންނާއި ދެކޮޅަށް ފިޔަވަޅު އެޅުމުގެ ސަބަބުންނެވެ.