މެންޗެސްޓަރ ސިޓީގައި ހުރުމަށްފަހު ބާސެލޯނާއަށް ބަދަލުވުމަށް, މީގެ އެއް އަހަރު ކުރިން އެ ކްލަބު ދޫކޮށްލި ޖަރުމަނުގެ މިޑްފީލްޑަރ، އިލްކޭ ގުންޑޮގަން އަނބުރާ އެ ޓީމަށް ދިއުމަށް ނިންމައިފިއެވެ. ގުންޑޮގަން މެންޗެސްޓަރ ސިޓީއަށް ބަދަލުވާނީ ޓްރާންސްފަރ ފީގެ ގޮތުގައި އެއްވެސް އަގަކާ ނުލައެވެ.

އުމުރުން 33 އަހަރުގެ ގުންޑޮގަން ބާސެލޯނާއަށް ބަދަލުވީ 2022/23 ސީޒަނުގައި މެންޗެސްޓަރ ސިޓީގެ ކެޕްޓަނެއްގެ ގޮތުގައި ހުރެ، އެ ސީޒަންގެ ތިން ތަށި ކާމިޔާބު ކުރުމަށްފަހުއެވެ. އޭނާ އަނބުރާ އެ ކުލަބާ ގުޅޭނީ އެއް އަހަރުގެ ކޮންޓްރެކްޓެއްގައެވެ. ނަމަވެސް ކޮންޓްރެކްޓުގެ މުއްދަތު އިތުރު ކުރުމުގެ ފުރުސަތު އޮންނާނެއެވެ.

ބާސެލޯނާއިން ބަދަލުވުމަށް އޭނާ ނިންމީ އެ ކްލަބުގެ މާލީ ހާލަތު ދަށްވެފައިވުމާއެކު، އޭނާ ކުޅޭ ޕޮޒިޝަނަށް ކުޅޭ ކުޅުންތެރިން އިތުރުވެ، ކުޅެން ފުރުސަތު ލިބުމުގެ ޗާންސު ދަށްވާނެކަމަށް ވެސް ބެލެވިފައި ވަނިކޮށެވެ. އަދި އޭނާވަނީ، ބާސެލޯނާއާއެކު ހަދާފައިވާ ކޮންޓްރެކްޓުގެ ބާކީ ދެ އަހަރުގެ މުސާރަ ވެސް މާފު ކޮށްދީފައެވެ.

ޕެޕް ގާޑިއޯލާއާ އެކު ހަތް ސީޒަން ހޭދަކުރުމަށްފަހު، ޖޫން 2023 ގައި ގުންޑޮގަން ބާސެލޯނާއަށް ބަދަލުވީ، އެ ކުލަބަށް ކުޅުމަކީ އޭނާގެ ކުޑަ އިރުގެ ހުވަފެނެއް ކަމުގައި ހާމަކުރުމަށްފަހުއެވެ. އަދި ނިމުނު ސީޒަނުގައި އޭނާ ވަނީ 5 ގޯލު ޖަހާ، 14 އެސިސްޓެއް ކޮށްދީފައެވެ. މީގެ އިތުރުން، ބާސެލޯނާގެ މުޅި ސްކޮޑަށް ބަލާއިރު، އެންމެ ގިނަ ވަގުތު ކުޅުމުގެ ފުރުސަތު ވެސް ލިބުނީ އޭނާއަށެވެ.

ނަމަވެސް، ބާސެލޯނާއަށް ކުރިމަތިވެފައިވާ މާލީ ދަތިތަކާހެދި، ލެމިން ޔަމާލް ފިޔަވައި އެހެން ހުރިހާ ކުޅުންތެރިން އެ ކުލަބުން ބޭނުންވަނީ ވިއްކާލާށެވެ.