ގްރޭޓަރ މާލެ ސަރަހައްދުގައި ރަޖިސްޓްރީނުކޮށް މަގުމަތީގައި ބަހައްޓާފައިހުރި އުޅަނދުތަކާއި މާލެ އަދި ހުޅުމާލެ މަގުތަކުގައި ހުރި އޭ ޒޯން ފިޔަވައި އެހެން ޒޯންތަކަށް ރަޖިސްޓްރީކޮށްފައިވާ އުޅަނދުތައް ވަގުތީ ގޮތުން ބެހެެއްޓުމަށްޓަކައި ހަމަޖެހިފައިވާ ބިން އެޗްޑީސީންް ޓްރާންސްޕޯޓް މިނިސްޓްރީ އާއި ހަވާލުކޮށްފިއެވެ.

އެބިމަކީ ހުޅުމާލެ ފޭސް 2 ގައި، އަލަށް އަޅަމަުން އަންނަ ފްލެޓްތައް ކައިރީގައި އޮތް 40،000 އަކަފޫޓުގެ ބިމެކެވެ. މިބިމުގައި ހަތަރު ފުރޮޅުލީ އެއްގަމު އުޅަނދުގެ 200 ވަރަކަށް އުޅަނދު ޕާކުކޮށްފައި ބޭއްވޭނެ ކަމުގައި ޓްރާންސްޕޯޓް މިނިސްޓްރީން ވިދާޅުވެއެވެ.

މިބިން ހަވާލުކުރުމަށް ބުދަ ދުވަހު ވަނީ، އެސަރަހައްދުގައި ޚާއްޞަ ރަސްމިއްޔާތެއް ބާއްވާފައެވެ. މިރަސްމިއްޔާތުގައި ބިން ހަަވާލު ކުރި ކަމުގެ ލިޔުން ޓްރާންސްޕޯޓް މިނިސްޓަރ މުޙައްމަދު އަމީން އާއި ހަވާލުކޮށްދެއްވީ، އެޗްޑީސީގެ މެނޭޖިން ޑައިރެކްޓަރ އިބްރާހީމް ފަޟުލް ރަޝީދެވެ.

މިނިސްޓަރ އަމީން ވިދާޅުވީ، މާލެ ސަރަހައްދުގެ މަގުތަކުގައި ޕާކުކޮށްފައި ހުރި، ރަޖިސްޓްރީ ނުކުރެވި ހުރި ވެހިކަލްތަކާއި، އަދި ޒޯން އޮޅުވާލައިގެން ގެންގުޅެމުންދާ ވެހިކަލްތަކާއި، އަދި ނުބައި ނަމްބަރު ޕްލޭޓް އަޅުވައިގެން ގެންގުޅޭ ވެހިކަލްތައް އެ ބިމަށް ގެނެސް ބަހައްޓަން ޖެހޭނެ ކަމަށެވެ.

އަދި ޕާކުކުރުމަށް ކަނޑައެޅި އެސަރަހައްދަށް ގެނެސްފައި ހުންނަ ވެހިކަލްތައް ޓޯވ ނުކުރާނެ ކަމަށާއި، އެތަނަށް ވެހިކަލްތައް 40 ދުވަހުގެ ތެރޭގައި ގެންނަން ޖެހޭނެ ކަމަށެވެ. އަދި އެތަނުގައިވެސް އުޅަނދުތައް ބެހެއްޓޭނީ ގިނަވެގެން 6 މަސް ދުވަސް ވާންދެން ކަމުގައި މިނިސްޓަރ އަމީން ވިދާޅުވިއެވެ.

ގްރޭޓަރ މާލެ ސަރަހައްދުގައި ރަޖިސްޓްރީނުކޮށް މަގުމަތީގައި ބަހައްޓާފައިހުރި އުޅަނދުތަކާއި މާލެ އަދި ހުޅުމާލެ މަގުތަކުގައި ހުރި އޭ ޒޯން ފިޔަވައި އެހެން ޒޯންތަކަށް ރަޖިސްޓްރީކޮށްފައިވާ އުޅަނދުތައް ޤާނޫނާއި އެއްގޮތަށް ރަޖިސްޓްރީ ކުރުމަށް ޓްރާންސްޕޯޓް މިނިސްޓްރީން ވަނީ، އުޅަނދުތަކުގެ ވެރިފަރާތްތަކަށް މުހުލަތު ދީފައެވެ.