އިޒްރޭލުގެ ރައްޔިތުންނަށް ރާއްޖެ އެެތެރެ ނުވެވޭ ގޮތަށް ރާއްޖެއިން އެޤައުމުގެ ޕާސްޕޯޓް މަނާކުރުމަށް ނިންމިފަހުންވެސް މިހާތަނަށް ފަތުރުވެރިންގެ ގޮތުގައި އިޒްރޭލުގެ 196 މީހުން ރާއްޖެ އެތެރެ ވެއްޖެއެވެ.

އިމިގްރޭޝަނުން އާއްމުކޮށްފައިވާ ފާއިތުވި ދެމަހުގެ ތަފާސް ހިސާބަށް ބަލާއިރު ޖޫން މަހު 86 މީހުން، އަދި ޖުލައި މަހު 124 މީހުން ފަތުރުވެރިންގެ ގޮތުގައި ރާއްޖެއަށް އައިސްފައި ވެއެވެ. 

ރާއްޖޭން އިޒްރޭލް ޕާސްޕޯޓް މަނާކުރުމަށް ވަޒީރުންގެ މަޖިލީހުން ނިންމިކަން ސަރުކާރުން އިއުލާނު ކުރީ މިއަހަރުގެ ޖޫން މަހުގެ 2 ވަނަ ދުވަހުގައެވެ. ތަފާސް ހިސާބުތަކުން ދައްކާ ގޮތުގައި އެދުވަހު އެކަނިވެސް އިޒްރޭލުގެ 8 މީހުން ފަތުރުވެރިންގެ ގޮތުގައި ރާއްޖެ އެތެރެވިއެވެ.

ސަރުކާރުން އިޒްރޭލުގެ ޕާސްޕޯޓު މަނާކުރުމަށް ނިންމިކަން އިއުލާނު ކުރުމާއި ގުޅިގެން އެކަމަށް ދުނިޔޭގެ މީޑިއާތަކުގެ ސަމާލުކަން ހުއްޓިގެން ދިޔައެވެ. އެހެން ނަމަވެސް ސަރުކާރުގެ ނިންމުމަށް 3 މަސް ދުވަސްވާން ކައިރިވެފައި ވާއިރު އަދިވެސް އަމަލީ ގޮތުން އެކަން ކުރެވިފައެއް ނުވެއެވެ. ވަޒީރުންގެ މަޖިލީހުން ނިންމާފައި ވަނީ ރައްޔިތުންގެ މަޖިލީހަށް ހުށަަައަޅައިގެން އިޒްރޭލުގެ ޕާސްޕޯޓުގައި ރާއްޖެއަށް އެތެރެ ނުވެވޭ ގޮތް ހެދުމަށެވެ.

އިސްރާއީލްގެ ޕާސްޕޯޓުގައި ރާއްޖެ އެތެރެވުން ހުއްޓުވުމަށްޓަކައި ޤާނޫނުތަކަށް ގެންނަންޖެހޭ އިސްލާޙްތައް ގެނައުމަށް ވަޒީރުންގެ މަޖިލީހުން ނިންމަވައި، އެމަސައްކަތް ކުރެއްވުމަށް ވަޒީރުންގެ މަޖިލީހުގެ ކޮމިޓީއެއްވެސް އެކުލަވާލެއްވިއެވެ.

ރާއްޖެއިން އިޒްރޭލުގެ ޕާސްޕޯޓު މަނާކުރުމަށް ނިންމި އިރު، އިޒްރޭލުން ގާޒާގައި ހިންގަމުން ގެންދާ ޤަތުލު އާއްމަށް އެއް އަހަރު ދުވަސްވާން ވަނީ ގާތްވެފައެވެ. އަދި އިޒްރޭލުގެ ހަމަލާތަކުގައި ގާޒާގެ 40000 ވުރެ ގިނަ މީހުން ވަނީ މަރުވެފައެވެ.