ބުޅާ މަހުން ކާބޯތަކެތި އުފައްދައިގެން ވިއްކިކަމަށް ތުހުމަތު ކުރެވުނު، ބަނގުލަދޭޝްގެ ރައްޔިތެއްކަމަށްވާ، ޢަރަފާތު ޙުސައިން އުފެއްދި ކާބޯތަކެތި ވިއްކި ފިހާރަތައް ކަމުގައި ބުނެ، އިމިގްރޭޝަންގެ ޓްވިޓާ ހޭންޑަލްގެ ނަކަލެއް ބޭނުންކޮށްގެން ހަދައި އާއްމުކޮށްފައިވާ ލިސްޓަކީ ސައްޙައެއްޗެއް ނޫންކަމުގައި މޯލްޑިވްސް އިމިގްރޭޝަނުން ވިދާޅުވެއްޖެއެވެ.

ހަދާފައިވާ ފޭކް ޕޯސްޓެއްގެ ސްކްރީން ޝޮޓެއް ޙިއްޞާކުރައްވައި، އިމިގްރޭޝަންގެ ކޮންޓްރޯލަރ ޝައްމާން ވެސް ވަނީ އެއީ އިމިގްރޭޝަންގެ ޕޯސްޓެއް ނޫންކަމުގައި ކަށަވަރުކޮށްދެއްވާފައެވެ. މޯލްޑިވްސް އިމިގްރޭޝަނުން ވިދާޅުވީ، އެ އިދާރާގެ ފޭސްބުކް ޕޭޖުން ކޮށްފައިވާ ޕޯސްޓެއް ކަމަށް ބުނެ ސޯޝަލް މީޑިއާގައި ދައުރުވަމުންދާ ފޮޓޯއަކީ ޞައްޙަ ފޮޓޯއެއް ނޫން ކަމަށާއި އެ ފަދަ ޒިންމާދާރުކަން ކުޑަ އަމަލުތައް ނުހިންގެވުމަށް އިލްތިމާސްކުރައްވާ ކަމަށެވެ.

ފޭކް ސްކްރީން ޝޮޓްތައް ސޯޝަލް މީޑިއާގައި ދައުރުވަމުން ދާއިރު، ޤަވާއިދާއި ޚިލާފަށް، ޢަރަފާތު ހިންގި މުޑުދާރު ބަދިގޭގައި އުފެއްދު ކާބޯތަކެތި ވިއްކި ތަންތަނަކީ ކޮބައިކަން އެނގެން ބޭނުންވާ ކަމުގައި އާއްމުންވެސް ދަނީ ސޯޝަލް މީޑިއާގައި ޝުއޫރުފާޅު ކުރަމުންނެވެ.

ބަނގުލަދޭޝްގެ ރައްޔިތެއްކަމަށްވާ، ޢަރަފާތު ޙުސައިން (32އ) ހައްޔަރުކުރުމަށް ފަހުގައި ފުލުހުން މިހާރު ވަނީ އޭނާ އިމިގްރޭޝަނާއި ހަވާލުކޮށްފައެވެ.